The Definitive Guide to Living in the Capital , Cairo , Egypt

الصور: بيشوي فايز

العاصمة المصرية فيها عدد كبير من المتاحف، لكن تعرف أن فيه متحف في المعادي، وبالتحديد عند كورنيش النيل هناك، فيها قطعة نادرة من القمر؟ ده بجد، وهتقدر تشوفها بنفسك مع مقتنيات مهمة أكثر بتذكرة سعرها 25 جنيه بس. تعالوا نتعرف أكثر على المتحف الجيولوجي المصري وتفاصيله.

المتحف الجيولوجي المصري فيه كنوز مش موجودة في أي متحف تاني في العالم، وأهم عينة في المتحف هي قطعة حقيقية من القمر قدمها دكتور فاروق الباز للمتحف، وعلشان كدة كثير من علماء الجيولوجيا بيجوا مصر مخصوص علشان يشوفوها عن قرب.

لكن قطعة القمر مش هي الحاجة القيمة الوحيدة في المتحف العظيم ده، فيه كمان جمجمة “آرثينوثيرم” الضخمة، المشهور بديناصور الفيوم، ودي هتشوفها بمجرد ما تدخل المتحف، والجمجمة دي هي الموجودة على شعار المتحف. وده من الكائنات الحية العملاقة اللي انقرضت في العالم كله من 40 مليون سنة لـ23 مليون سنة، وبيختلف عن وحيد القرن في أنه أكبر منه، وفيه عضمتين كبار جدًا في الجمجمة على شكل قرنين.

هتشوف كمان في المتحف أجزاء من هيكل عظمي لديناصور حقيقي العلماء اكتشفوه في مصر “حوالي 15% من الهيكل” و ده كنز بمعني الكلمة.

المتحف فيه كمان جزء كامل مليان بالأحجار الكريمة اللي تساوي ملايين، زي الماس والياقوت والزمرد.

هتشوفوا كمان هناك الصخور النارية اللي بتنتج من انفجار البراكين، ده غير مقتنيات مهمة زي الأشكال اللي تكونت بسبب الصواعق اللي وصلت للأرض أو النيازك.

تروح إزاي المتحف الجيولوجي المصري؟

العنوان: أول كورنيش المعادي من ناحيه زهراء مصر القديمه بعد الاشارة على الشمال و انت جي من ناحية الملك الصالح

المواعيد: يوميًا من 8.5 صباحًا ولحد الساعة 2.5 ظهرًا، ماعدا الجمعة و السبت والإجازات الرسمية.

سعر التذكرة: 25 جنيه.