The Definitive Guide to Living in the Capital , Cairo , Egypt

المتحف القومي للحضارة المصرية.. المواعيد وأسعار التذاكر وطريقة الوصول
    بواسطة
    Mohamed Talaat

    مافيش شك إن المتحف القومي للحضارة المصرية بالفسطاط لفت أنظار العالم كله في الفترة الأخيرة، بعد الافتتاح الأسطوري للقاعة الرئيسية اللي شهدت نقل مومياوات الملوك المصريين من المتحف المصري بالتحرير إلى قاعات متحف الحضارة.

    في الموضوع ده هنعرفكم على مواعيد زيارة متحف الحضارة بالفسطاط بالإضافة إلى أسعار التذاكر وطريقة الوصول للمكان بسهولة ومعلومات عن المتحف.

    معلومات عن المتحف القومي للحضارة المصرية

    هو متحف مصري تم افتتاحه حديثًا، بيتميز بالموقع المتميز في مصر القديمة، علشان يكون قريب من أقدم العواصم الإسلامية في مصر وأفريقيا، وهي مدينة الفسطاط اللي أسسها القائد عمرو بن العاص في عهد الخليفة عمر بن الخطاب رضي الله عنه، في القرن السادس الميلادي.

    بترجع أهمية المتحف القومي للحضارة بالاضافة الى كونه بيحتضن المومياوات الملكية المصرية اللي تم العثور عليها بالأقصر قبل أكثر من 100 سنة، إلى وجود قطع أثرية رائعة بتمثل حلقات تطور الحضارة المصرية من عصر ما قبل التاريخ ولحد عصرنا الحالي.

    يعني باختصار نقدر نقول إنه متحف شامل بيمثل جميع فترات التاريخ المصري بداية من الفرعوني واليوناني والروماني والقبطي والإسلامي وحتى التاريخ المعاصر، وبيضم متحف الحضارة بالإضافة إلى المعروضات الأصلية بعض المستنسخات اللي جرى تصميمها بمنتهى الدقة لإيضاح الفكرة.

    ومشروع إنشاء المتحف مش وليد السنين الأخيرة، لكنه كان مخطط قبل 20 سنة من الوقت ده، وكان مخطط افتتاح المتحف في فترة ثورة يناير 2011، لكن الظروف السياسية والاقتصادية عطلت المشروع، وبعد تولي الرئيس عبد الفتاح السيسي رئاسة الجمهورية، ووسط التطورات اللي بتحصل في مصر مؤخرًا، تم افتتاح المتحف، وتم تطوير المنطقة بالكامل في الفسطاط، وتجهيز بحيرة عين الصيرة اللي بيطل عليها المتحف، وبعدها تم الإعداد بكل دقة لحفل افتتاح القاعة الرئيسية بالمتحف، واللي كان حديث العالم كله.

    إزاي توصل لمتحف الحضارة المصرية بالفسطاط؟

    أسهل طريقة لزيارة المتحف، هي ركوب وسيلة مواصلات بتروح منطقة عين الصيرة بمصر القديمة، وفيه أتوبيسات كتير جدًا بتعدى من هناك، كمان ممكن توصلوا عن طريق عربيتكم الخاصة من خلال موقع المتحف على خرائط جوجل، أو استخدام وسائل النقل الذكي زي أوبر وكريم وإن درايف أو حتى سويفل.

    كمان تقدروا تستخدموا مترو الأنفاق، اتجاه المرج حلوان، والنزول بمحطة الملك الصالح وركوب ميكروباص مباشرة إلى المتحف من موقف محطة مترو الملك الصالح.

    مواعيد متحف الحضارة المصرية بالفسطاط

    بيستقبل المتحف القومي للحضارة المصرية بالفسطاط الزائرين من الساعة 9 صباحًا وحتي الساعة 4 عصرًا.

    أسعار تذاكر متحف الحضارة المصرية بالفسطاط

    أسعار تذاكر زيارة المتحف القومى للحضارة المصرية للمصرى 60 جنيه، والطالب المصري 30 جنيه، والزائر الأجنبي 200 جنيه، والطالب الأجنبي 100جنيه.

    وفيه بعض الفئات المصرح لهم بدخول المتحف مجانًا زي كبار السن المصريين “فوق سن 60” وذوي الاحتياجات الخاصة.

    مقترح