“اليوم العالمي للمتاحف”.. 10 متاحف في القاهرة في انتظارك والدخول مجانًا
اليوم العالمي للمتاحف زيارة المتاحف المصرية كل المتاحف مجانية متاحف مجانية
Mohamed Talaat
يوم 18 مايو من كل عام بيحتفل العالم باليوم العالمي للمتاحف، وكل سنة بيتم تسليط الضوء على موضوع محدد، والسنة دي الاحتفال هيكون تحت عنوان “المتاحف من أجل التعليم والبحث العلمي”، للتأكيد على الدور الحيوي للمؤسسات الثقافية في توفير تجربة تعليمية شاملة، ومصر بتحتفل كل سنة باليوم ده باختيار مجموعة من المتاحف علشان تكون زيارتها للجمهور مجانية، ووزارة السياحة أعلنت أن فيه 10 متاحف متاح زيارتهم مجانًا يوم السبت 18 مايو، فتعالوا نتعرف على المتاحف دي علشان تبقى في خطتكم للزيارة خلال الويك إند.
المتحف المصري
موجود في ميدان التحرير وهو من أهم المشاركين في اليوم العالمي للمتاحف لأنه بيضم مجموعة كبيرة من الآثار التاريخية اللي بتحكي عن حقبات ما قبل الميلاد في مصر.
متحف الفن الإسلامي
أكبر وأهم متحف إسلامي في العالم، وموجود في باب الخلق أمام مديرية أمن القاهرة وفيه مجموعات متنوعة من الفنون الإسلامية من الهند والصين وإيران والسعودية ومصر وأكثر.
المتحف القبطي
بيضم مجموعة نادرة ومتنوعة من الفن القبطي، وبدأت فكرة إنشائه سنة 1898 عن طريق مرقس باشا سميكة وافتتح سنة 1910، وهو أكبر متحف في العالم يضم مجموعة مميزة من الفن القبطي وموجود في منطقة مصر القديمة بالقرب من مسجد عمرو بن العاص.
قصر المنيل
هو متحف قصر محمد علي بالمنيل وله مكانة تاريخية كبيرة لأنه بيعبر عن تاريخ مصر الحديث وبيضم في تصميماته المعمارية الفريدة الطراز الإسلامي المقتبس من المدارس المملوكية والفارسية، وكمان مزين بزخارف أندلسية وسورية ومغربية بروح عثمانية.
متحف جاير أندرسون
معروف باسم “بيت الكريتلية”، وزمان كان اسمه سبيل ومنزل محمد بن الحاج سالم الجزار وموجود بمنطقة السيدة زينب، وهو مكون بيتين مربوطين بممر وهو من الآثار الإسلامية الثمينة والنادرة اللي بتنتمي للعصر العثماني والمملوكي.
متحف المركبات الملكية
من أعرق المتاحف النوعية في العالم، وهو مخصص بمنطقة بولاق أبو العلا لحفظ وعرض التراث الثقافي للمركبات الملكية اللي كانت مملوكة لأسرة محمد علي، وكمان بيسلط الضوء على تربية الخيل والاهتمام بيها.
متحف الشرطة
داخل قلعة صلاح الدين الأيوبي هتلقوا صور أشهر المجرمين زي الخط وريا وسكينة، وكمان جوا المتحف فيه مقتنيات كتير لأجهزة خاصة بالشرطة المصرية سواء القديمة أو الحديثة، مع أدوات وملابس خاصة بقوات الشرطة ف الأقسام.
متحف إيمحتب
متحف إيمحتب هو متحف أثري موجود عند مجمع سقارة بالقرب من ممفيس بمنطقة دهشور، واملتحف فيه 6 قاعات عرض فيها مجموعة كبيرة من التوابيت واللوحات والأواني والتماثيل من نتائج حفر البعثات في منطقة سقارة.
متاحف مطار القاهرة الدولي
مطار القاهرة بيضم متحفين والاثنين هيكون دخولهم مجانًا، الاول موجود في صالة 2 وبيضم مجموعة كبيرة من الآثار والعملات والأيقونات والأطباق المزخرفة والمصاحف وغيرها اللي بتبرز السمات الفنية لمصر القديمة سواء الفرعونية أو اليونانية والرومانية والقبطية والإسلامي، وحتى العصر الحديث.
أما متحف صالة 3 فبيوضح التطور الحضاري لمصر وتنوع الآثار من خلال 39 قطعة أثرية قيمة تم نقلها من المتحف المصري والقبطي والإسلامي، ده غير مجموعة نادرة لعصر ما قبل الأسرات وتمثال للكاتب المصر من الأسرة الخامسة، ومجموعة من تمثايل العصرين الروماني واليوناني .
مقترح
الحياة في كايرو
انبساط وراحة نفسية.. خروجات في القاهرة لعشاق التأمل
التأمل في القاهرة تغيير مود الشغل +2
الحياة في كايرو
