The Definitive Guide to Living in the Capital , Cairo , Egypt

معالم وسياحة

بالفيديو: هتسافر فين في العيد؟ دليلك لأجمل الأماكن في مصر

بالفيديو: هتسافر فين في العيد؟ دليلك لأجمل الأماكن في مصر
    بواسطة
    Hager Eissa

    ياتري هتعملوا إيه السنة دي في العيد؟؟  لو لسة ماخدتوش قرار أحنا جمعنا لكم أحسن خمس أماكن في مصر تقدروا تسافروا لهم في العيد، علشان تتبسطوا وتغيروا جو وتفصلوا من جو الروتين والشغل بتاع كل يوم .

    مرسي مطروح

    من أجمل الأماكن اللي ممكن تزوروها هي مرسي مطروح لأن جوها في الوقت ده من السنة بيكون أكثر من ممتاز فهتعرفوا تقضوا هناك وقت جميل بالنهار علي البحر وبليل تخرجوا وتستمعوا بركوب العجل و التسوق في شوارعها .

    ومن أكثر الأماكن المميزة في مرسي مطروح (شاطئ الغرام– شاطئ عجيبة– حمام كليوباترا- شاطئ روميل- كورنيش مطروح).

    ده غير أن فيها بعض الأماكن التاريخية زي مخبأ روميل وده عبارة عن كهف في قلب الجبل كان بيستخدمه القائد الألماني روميل لوضع الخطط الحربية وتم تحويله لمتحف وده بييجي له ناس من كل مكان في العالم.

    دهب

    أما بقي لو كنت من محبي الغطس والنزول تحت الماء فدهب هتكون المكان المفضل والمحبب ليك وده لأن فيها البلو هول (Blue hole) ثاني أحسن مكان في العالم للشعب المرجانية واللي اتكونت من أصطدام نيزك بالأرض عشان يكون لنا مجموعة متنوعة ومتميزة من الشعب المرجانية.

    يعني أقدر أقول لكم في دهب هتقدروا تستمتعوا طول النهار بالبحر والأسماك والشعب المرجانية وبليل بقي القعدة السيناوي مع الشاي البدوي هينسوك أسمك خاصة لو قررت تنضم للرحلات اللي بتتنظم لتناول العشاء في الجبل ودي ثاني أكثر حاجة هتستمتع بيها في دهب لأنك هتنفصل عن كل الأصوات والدوشة اللي متعودين عليها، وهتلاقي نفسك في حضن الجبل والنجوم منوره السماء وبتتعشا وبتشرب شاي بدوي علي أنغام الأغاني السيناوية الجميلة.

    نويبع

    من أكثر الأماكن اللي هتخليك تفصل عن جو القاهرة ومن أحسن الحاجات في نويبع أن أكثر الإقامات فيها بتكون في كامبات واللي بتتكون من أكواخ علي البحر مباشرة وأغلب الأضاءة بتكون بشمع أو نار فقط يعني جبل وراك وبحر قدامك والنجوم هي اللي منورالك حياتك، هو فيه أحسن من كده في الدنيا؟

    من أكثر الأماكن اللي لازم تزوروها في نويبع (وادي الوشواش، الوادي الملون، ده غير سهرات الجبل).

    العين السخنة

    يعني احتفالات وفسح وسهرات كل يوم ده غير أن جوها مناسب جدًا للعائلات لأن بالنهار هتنزلوا البحر وحمامات السباحة وبليل بيتم تنظيم أحتفالات بمناسبة الأعياد داخل كل الفنادق ، الجو هناك بيكون حر شوية في الوقت ده من السنة بس طبعًا البحر بيهون حاجات كتير.

    الفيوم

    كمان تقدر تنظم يوم مع عائلتك وتروحوا الفيوم وتستمتع بشلالاتها وطبيعتها الجميلة، والتزحلق علي الرمل هناك من أحسن الأنشطة اللي ممكن تعملها وتستمتع جدًا بيها، طبعًا ده بجانب ركوب الخيل و المركب في البحيرة المسحورة واللي أتسمت كده لأنها مستخبية وسط جبال ومش ممكن أي حد يشوفها من بعيد.

    ده غير زيارة بعض الأماكن التاريخية هناك زي معبد قارون ووادي حيتان اللي ممكن تخيم فيه وتتفرج علي أجمل النجوم في السماء، ومش ممكن تنهي زيارتك للفيوم من غير ما تطلع علي جبل المدورة وتاخد أحلي صور.

    نيجي بقي لقرية تونس

    دي بقي من أشهر الأماكن في الفيوم و كل سنتيمتر فيها بينطق إبداع، المكان بسيط ومتكون من بيوت مبنية بالطوب و متزينة بشكل جمالي وفيها عدد من البحيرات اللي بتزينها، قرية تونس مشهورة بأعمال الخزف والمسابقات السنوية اللي بتتعمل فيها.

    المكان جميل جدًا والهدوء هناك كفيل أنه يخليك تدخل في جو استرخاء جميل، وعلي فكرة هناك في فنادق علي مستوي عالي جدًا فممكن تحجز أنت وعائلتك وتقضي كام يوم بعيد عن دوشة وزحمة القاهرة.

    ونصيحتنا ليكم سافروا ففي السفر حياة، ده غير أنكم هتتعرفوا علي جمال وحلاوة مصر. كل سنة وأنتم طيبين وأجازة سعيدة.

    مقترح