The Definitive Guide to Living in the Capital , Cairo , Egypt

معالم وسياحة

جبخانة محمد علي بمصر القديمة.. حكاية مكان أثري منسي في القاهرة

أثار مصر القديمة القاهرة التاريخية تطوير جبخانة محمد علي جبخانة محمد علي
جبخانة محمد علي بمصر القديمة.. حكاية مكان أثري منسي في القاهرة
    بواسطة
    Mohamed Talaat

    مصدر الصورة الرئيسية: ويكيبيديا

    العاصمة المصرية فيها أماكن أثرية وتاريخية مهمة جدًا، لكن للأسف اتعرضت للنسيان والإهمال في السنين اللي فاتت.. لكن الإيجابي هو إن الدولة المصرية بتشتغل حاليًا على تطوير وإحياء أماكن تاريخية كتير، منها جبخانة محمد علي بحي مصر القديمة، واللي أعلنت محافظة القاهرة مؤخرًا عن إنها شغالة على تطويرها.. تعالوا نعرف التفاصيل.

    جبخانة محمد علي موجودة في “عزبة خير الله” بمنطقة الجبل في حي مصر القديمة، وهي قريبة من الطريق الدائري، وبيرجع تاريخ إنشائها لسنة 1829م، وكان الهدف إنها تكون مخزن للذخيرة المكونة من الكبريت وملح البارود والبارود، وده بعد تكرار اشتعال الحرائق في المخزن الأصلي اللي كان موجود في القلعة.

    وجبخانة محمد علي كانت في منطقة صحراوية بعيدة عن العمران في وقت إنشائها، وكان لها سور خارجي، وموجود في المكان بعض الغرف خارج مبنى الجبخانة، بتتصل ببعضها عن طريق ممر منخفض عن سطح الأرض.

    وبيبلغ طول الأثر ده حوالي 180 متر، وعرضه حوالي 115 متر، وبيتوسطه فناء واسع، وفيها آبار ماء التبريد لتقليل درجة حرارة المكان، وتم تصميم النوافذ والغرف بشكل خاص لمنع دخول حرارة الشمس الشديدة للمكان، وده لتجنب اشتعال بارود المخزن، وكانت الآبار عبارة عن ممرات تحت الأرض اسمها (صهريج) مليانة بالمياه.

    تطوير جبخانة محمد علي

    حاليًا، بتتبنى محافظة القاهرة بكافة أجهزتها مشروع تطوير منطقة جبخانة محمد علي، وده ضمن المخطط القومي للقضاء على العشوائيات وإحياء القيمة التراثية للمناطق الأثرية التلي عانت في السنين اللي فاتت من الإهمال الشديد.

    وبحسب تصريحات إعلامية للمهندسة جيهان عبد المنعم، نائب محافظ القاهرة للمنطقة الجنوبية، جاري حاليًا إنشاء طريق صاعد للجبخانة ضمن مشروع إحياءها وتطوير المناطق العشوائية، خاصة بعد نقل سكان منطقة اسطبل عنتر العشوائية وتسليمهم وحدات مفروشة بحي الأسمرات.

    مقترح