The Definitive Guide to Living in the Capital , Cairo , Egypt

الدكتور زاهي حواس، عالم المصريات ووزير السياحة الأسبق، كتب مقال في موقع أخبار اليوم كشف فيه تفاصيل مهمة عن افتتاح المتحف المصري الكبير، اللي بيعتبره أهم مشروع ثقافي في القرن الـ21! في السطور الجاية هنلخصلكم أهم 5 معلومات كتبهم بنفسه في مقاله:

1 – الافتتاح يوم 3 يوليو.. وهيكون “عيد عالمي”

زاهي حواس أكد إن افتتاح المتحف المصري الكبير هيكون يوم 3 يوليو، وقال بالنص: “ده اليوم اللي هيعتبر عيد عالمي، لأن الناس هتشوف فيه أعظم وأكبر متحف في العالم”.

2 –  آثار توت عنخ آمون هتتقدم بطريقة عرض جديدة لأول مرة

كل قطع الملك الذهبي توت عنخ آمون هتتعرض بطريقة مختلفة أول مرة نشوفها بالشكل ده. منها:

 القناع الذهبي المشهور.

الكرسي الملكي اللي عليه مشهد رومانسي بين توت وزوجته.

المقصورة الذهبية اللي بتخرج منها الآلهة بشكل مبهر.

دكتور زاهي قال إن حتى التفاصيل الصغيرة زي “فردة الحذاء الواحدة” للملك والملكة، ليها معنى عميق بيوضح إنهم كانوا “روح واحدة”.

3 –  المتحف هيرجع مصر على خريطة السياحة العالمية

زاهي حواس شايف إن المتحف ده هيخلي مصر سنة 2025 وجهة السياحة الأولى في العالم. وبيقول: “مافيش بلد في الدنيا عندها الأمان والسحر والعشق زي مصر وآثارها”.

4 – رؤساء وملوك من كل العالم هيحضروا الافتتاح

بحسب زاهي حواس الرئيس عبد الفتاح السيسي ناوي يدعو كبار الشخصيات في العالم، وهيتم توقيع كتاب ضخم عن توت عنخ آمون بيعتبره المتحف البريطاني “أعظم كتاب عن الآثار المصرية”.

5 – الاحتفال هيكون بسيط.. علشان البطل الحقيقي هو المتحف

الدكتور حواس ناشد إن الافتتاح يكون على مدار أيام، والمحتوى الثقافي والفني يكون بسيط لأن “المتحف نفسه هو الحدث”. ووجه شكره للرئيس السيسي، ورئيس الحكومة، والفنان فاروق حسني اللي اختار مكان المتحف من البداية.

وأخيرًا..

افتتاح المتحف المصري الكبير مش مجرد حدث أثري، ده رسالة قوية من مصر للعالم كله بتقول فيها: “إحنا أصل الحضارة.. ولسه عندنا كتير نقدمه”.

مبروك لمصر!