The Definitive Guide to Living in the Capital , Cairo , Egypt

نقدر نقول إن تقريبًا مافيش حد فينا مفيش عنده حس المغامرة في حياته، وأكيد كل واحد فينا كان ليه قصة أو مغامرة عملها بيحكي وهيحكي عنها طول عمره، وممكن كمان تكون هي إنجازه اللي بيفتخر بيه قدام أهله و حبايبه وأصحابه، لكن (علي عبده) كان ليه مغامرة خاصة جدًا، وفريدة من نوعها، ومش سهلة أبدًا، مغامرة تستحق إنها تتحكي، وتستحق كل التقدير والإعجاب.

المغامر والرحَّالة المصري (على عبده) قرر إن مغامرته تجمع بين شغفه والحاجة اللي بيحبها، وبين هوايته المفضلة، وهي “ركوب الموتسيكلات” وبناءً عليه، قرر إن تكون مغامرته الأولى عبارة عن رحلة لف فيها مصر كلها على الموتوسيكل بتاعه في 14 يوم بس، وكان الهدف من ده هو الترويج للأماكن السياحية في كل محافظات مصر.

في الأول (عبده) كان بدأ ينشر صور ومعلومات من رحلته الأولى عن الأماكن والمناطق اللى زارها خلال رحلته، لكن بعض الناس شككوا في الصور دي، فقرر (عبده) إنه يبدأ رحلة تانيه ويوثقها بالصور والفيديو، قطع فيها مسافة 6 آلاف كيلو متر في أسبوع واحد على موتسيكله اللي كان بسيط “موديل التسعينيات” وساعتها اتسجلت رحلته دي فى 5 موسوعات عالمية.

وعلى حسب كلام (عبده) إنه مش هيقف عند مغامرته الأخيرة دي، وهيبدأ في التحضير لخطوة أو بمعنى أصح “مغامرة” ثالثه هتكون عبارة عن رحلة لكن هتبقى بدراجة كهربائية، وهتكون حولين العالم، علشان يروج للسياحة المصرية، وهتبقى تحت رعاية وزارة الإنتاج الحربى.