عيش يوم مع التاريخ! متاحف مصر بالمجان في اليوم العالمي للمتاحف
أماكن الخروج في القاهرة السياحة في مصر المتحف القبطي اليوم العالمي للمتاحف ركن فاروق قصر المنيل متاحف مصر متحف إيمحتب متحف الفن الإسلامي متحف المركبات الملكية وزارة السياحة
Mohamed Talaat
مصر هتحتفل يوم الأحد 18 مايو 2025 باليوم العالمي للمتاحف، وخلينا نقول إن اليوم ده احتفالية عالمية بالتنسيق مع المجلس الدولي للمتاحف. السنة دي شعارهم: “مستقبل المتاحف في مجتمعات سريعة التغير”. وطبعًا بما إن مصر رائدة في مجال الآثار، وفيها أقدم متحف في التاريخ زي “متحف الإسكندرية القومي”، فمشاركتها دايمًا بتكون مميزة. السنة دي وزارة السياحة قررت تفتح المتاحف التابعة ليها مجانًا للمصريين في اليوم العالمي، باستثناء: المتحف المصري بالتحرير، المتحف المصري الكبير، المتحف القومي للحضارة بالفسطاط.
وفي السطور الجاية هنعرّفكم على كل المتاحف اللي تقدروا تزوروها ببلاش في القاهرة:
متحف الفن الإسلامي
أكبر متحف للآثار الإسلامية في العالم، فيه قطع أثرية من جميع أنحاء العالم الإسلامي بتمثل مجالات زي الفلك، الطب، العمارة، وغيرهم. المعروضات متنوعة بين الخشب، الخزف، والمخطوطات. وأشهر قطعة فيه: مفتاح الكعبة من العصر المملوكي.
العنوان: شارع بورسعيد – ميدان باب الخلق.
سعر التذكرة في الأيام العادية: 20 جنيه.
المتحف القبطي
أكبر متحف للآثار القبطية في العالم، بيعرض تاريخ المسيحية في مصر من خلال مخطوطات، منحوتات، أيقونات، وجداريات نادرة. المتحف بيبرز كمان تأثر الفن القبطي بحضارات تانية قديمة.
العنوان: شارع مارجرجس – مصر القديمة.
سعر التذكرة في الأيام العادية: 20 جنيه.
متحف قصر المنيل – الأمير محمد علي
معروف باسم متحف الأمير محمد علي، وبيعتبر مدرسة للفنون الإسلامية المختلفة. هتلاقوا فيه سراي الاستقبال، سراي الإقامة، سراي العرش، المسجد، متحف الصيد، القاعة الذهبية، وبرج الساعة، وسط حديقة مليانة نباتات وأشجار نادرة.
العنوان: شارع السراي – منيل الروضة.
سعر التذكرة في الأيام العادية: 20 جنيه.
متحف المركبات الملكية
من أعرق المتاحف اللي بتحفظ التراث الملكي، بيعرض مركبات فخمة من عصر أسرة محمد علي، وكمان أدوات الخيول وملابس العاملين. أشهر المعروضات: عربة الآلاي الكبرى، هدية من نابليون الثالث وزوجته للخديوي إسماعيل وقت افتتاح قناة السويس.
العنوان: شارع 26 يوليو – بولاق أبو العلا.
سعر التذكرة في الأيام العادية: 30 جنيه.
جابر اندرسون
بيتميز بتصميم شرقي فريد، وكان عبارة عن بيتين ضمّهم الضابط الإنجليزي جاير أندرسون، ووهبهم للجنة حفظ الآثار. هتلاقوا أثاث أندلسي ودمشقي وتحف نادرة من مجموعته الشخصية.
العنوان: ميدان أحمد بن طولون – السيدة زينب.
سعر التذكرة في الأيام العادية: 10 جنيه.
متحف ركن فاروق
تحفة معمارية شيدها الملك فاروق سنة 1942 كاستراحة شتوية، مصممة على شكل قارب على النيل. هتزوروا المرسى النهري، الحديقة اللي فيها 39 نوع من الشجر النادر، وقاعات ملكية وأثاث وتحف من العصر الملكي.
العنوان: كورنيش النيل – حلوان.
سعر التذكرة في الأيام العادية: 20 جنيه.
متحف إيمحتب
اسم المتحف على اسم المهندس والطبيب العظيم “إيمحتب”، باني هرم زوسر. المتحف بيتكون من 6 قاعات، بيعرض تطور العمارة في سقارة، وأسلوب الدفن في مصر القديمة. فيه تماثيل نادرة، وأقدم مومياء ملكية لـ”مري إن رع”.
العنوان: منطقة آثار سقارة – طريق المريوطية السياحي – الهرم
سعر التذكرة في الأيام العادية: 30 جنيه
مقترح
الحياة في كايرو
محطة الرماية: أول هرم في القاهرة هينقلك لتحت الأرض! (شوف الصور)
الخط الرابع للمترو المتحف المصري الكبير +7
الحياة في كايرو
