The Definitive Guide to Living in the Capital , Cairo , Egypt

معالم وسياحة

منهم المسلة المعلقة.. 4 حاجات مدهشة هتشوفوها بس في المتحف المصري الكبير

الدرج العظيم المتحف المصري الكبير المسلة المعلقة تفاصيل العرض المتحفي مركب خوفو مقتنيات توت عنخ آمون
منهم المسلة المعلقة.. 4 حاجات مدهشة هتشوفوها بس في المتحف المصري الكبير
    بواسطة
    Mohamed Talaat

    كل عشاق الحضارة المصرية القديمة في مصر والعالم، منتظرين حفل افتتاح المتحف المصرى الكبير، اللي متوقع يكون حفل أسطوري غير مسبوق في العالم.. في السطور الجاية هنتعرف على 4 حاجات مدهشة مش هتشوفوها غير في المتحف المصري الكبير.. تعالوا نعرفهم مع بعض:

    المسلة المعلقة

    أول ميدان لمسلة معلقة فى العالم هيكون في المتحف المصرى الكبير، وهتظهر المسلة المعلقة براعة المصرى القديم فى تصميم ونحت الآثار القديمة، وهو ابتكار جديد جاري العمل عليه، وهيقع ميدان المسلة المعلقة بالمدخل الرئيسي على مساحة 7 أفدنة، وبيتم تنفيذ الميدان ده بأيادى مصرية وتصميم مصري خالص.

    ومن خلال تصميم المسلة المعلقة هيتمكن الزائرين للمتحف المصري الكبير من الدخول لقاعدة المسلة علشان يشوفوا القاعدة الأثرية وبالنظر إلى أعلى هيقدروا يشوفوا خرطوش الملك رمسيس الثاني.

    الدرج العظيم

    هيضم الدرج العظيم 72 قطعة أثرية، وهيركز سيناريو العرض المتحفي للدرج العظيم على الملوك والآلهة، وهينقسم لـ 4 أقسام، القسم الأول هنعرف منه إزاي تم تصوير “الملك” ونحته فى الأعمال المصرية القديمة، وليه بعض القطع بتكون كبيرة الحجم، وقطع تانية بتكون أصغر.

    أما القسم الثاني فهيركز على منزلة الآلهة، وهيشمل نحت الملوك خلال مشاركتهم الطقوس الدينية، إضافة إلى الركائز والأعمدة وغيرها من العناصر المميزة للمعابد.

    وهيركز القسم الثالث على علاقة الملك والآلهة، أما القسم الرابع فهيركز على التوابيت الملكية.

    مراكب خوفو

    زوار المتحف المصرى الكبير هيشوفوا بعينهم أعمال ترميم مركب خوفو الثانية على الطبيعة خلال زيارتهم للمتحف بعد افتتاحه، وده لإن أعمال تجميع المركب مش هتنتهي قبل افتتاح المتحف، لأنها هتستغرق وقت طويل لتجميعها متوقع يكون 3 سنين على الأقل.

    مقتنيات توت عنخ آمون

    هيتم عرض مقتنيات الملك الذهبي توت عنخ آمون اللي بتتجاوز الـ 5000 قطعة أثرية على مساحة هتبلغ 7000 متر مربع، وده بيحصل لأول مرة في العالم أمام الجمهور.

    مقترح