The Definitive Guide to Living in the Capital , Cairo , Egypt

معالم وسياحة

من بيت السحيمي لبيت الهراوي.. 10 أماكن تاريخية في القاهرة بتستضيف فعاليات مميزة

الأزهر الغوري بيوت القاهرة التاريخية تنورة ثقافة حفلات شعر عود غناء فعاليات في القاهرة فن قصور القاهرة التاريخية مسرح
من بيت السحيمي لبيت الهراوي.. 10 أماكن تاريخية في القاهرة بتستضيف فعاليات مميزة
    بواسطة
    Mohamed Talaat

    القاهرة فيها أماكن كتير للترفيه، وكل مكان له حكاية، وأصل وفصل، وعلشان إحنا مهتمين بالحياة في العاصمة، وبمناسبة مرور 10 سنين على موقعكم كايرو 360، هنقول لكم في السطور الجاية على 10 أماكن تاريخية تقدروا تزوروها، وكمان تستمتعوا فيها بحضور أحلى الفعاليات الثقافية والفنية، والأماكن دي معظمها تابع لوزارة الثقافة.

    بيت السحيمي

    أو بيتقال عليه بيت الشيخ عبد الوهاب الطبلاوي، وهو بيت عربي بمعمار شرقي، موجود في حارة الدرب الأصفر في حي الحسين، وفيه قسمين واحد قبلي اتبنى سنة 1648، وبناه الطبلاوي، والبحري اللي اتبنى 1797، على إيد الحاج إسماعيل شلبي، اللي فتح الجزأين على بعض وخلاهم بيت واحد.

    وسبب تسمية البيت بإسم السحيمي، هو إن آخر حد سكن فيه كان هو الشيخ محمد أمين السحيمي، شيخ رواق الأتراك بالجامع الأزهر.

    قصر الأمير طاز

    موجود في القاهرة القديمة، وبالتحديد في شارع السيوفية بمنطقة الخليفة بالقلعة، بناه الأمير سيف الدين طاز بن قطغاج، وهوة واحد من الأمراء البارزين في دولة المماليك، وده كان سنة 1352، ولما اتبنى القصر كان عبارة عن حديقة كبيرة، وحواليها 4 مباني، “الحرملك – المقعد – اللواحق والتوابع – الإسطبل”.

    والقصر مبني على مساحة 8000 متر، وحاليًا بيشهد عروض فنية وثقافية مميزة.

    قصر المانسترلي

    من أجمل القصور الموجودة في مصر، وبناه حسن فؤاد باشا المانسترلي، وهو أول محافظ لمصر حمل اللقب، سنة 1850، وموجود في شارع المقياس بمنطقة منيل الروضة، والقصر تحفة معمارية نادرة بتطل على النيل، وبيتكون من صالة مستطيلة مسقوفة بسقف خشبي وجناح يضم قاعة معيشة وغرفتين نوم وحمام، بالجهة الغربية، وكمان غرفة بالجهة الشمالية.

    القصر بيحيطه شرفة خشبية بتطل على النيل.

    قصر الأمير باشتاك

    في شارع المعز لدين الله الفاطمي، وبالتحديد عند سبيل عبد الرحمن كتخدا، هتلاقوا قصر الأمير باشتاك، واللي اتبني سنة 1339، ورغم أن القصر اتنهب، إلا أنه ما زال باقي منه اللي يدل على جماله وفخامته، وما زال بيتعمل فيه حفلات ومعارض بيستضيفها دايمًا.

    اللي بنى القصر هو الأمير سيف الدين بشتاك الناصري، وهو كان أحد أمراء الناصر محمد بن قلاوون، والقصر خضع لعمليات تطوير وإحلال وتجديد كتيرة بداية من سنة 2003، علشان يقدر يستقبل الحفلات والفعاليات المميزة، وفيه قاعة تدريب على الفن وقاعة معارض وبيت هدايا.

    تكية أبو الدهب

    هي في مواجهة الجامع الأزهر، وجنوب مسجد الحسين، واتبنت سنة 1774، وكانت مخصصة للسكن لكل متصوف تركي، وكان فيها سبيل وحوض، واللي بناها الأمير محمد بك أبو الدهب.

    التكية فيها صالة “صحن”، كبير ومفروشة بالرخام الملون، وموجود فيها حنفية كبيرة، وفوقيها قبة على 8 أعمدة رخام.

    بيت الست وسيلة

    البيت موجود في منطقة الأزهر في الحسين، واتبنى سنة 1664، وتاريخيًا البيت كان ملك شخص إسمه عبد الحق وأخوه لطفي وهما أبناء محمد الكناني، واتسمى بيت الست وسيلة، اللي هي “خاتون بنت عبد الله البيضا معتوقة” لأنها كانت آخر واحدة امتلكت البيت ده.

    البيت هو نموذج للعمارة الفريدة في العصر العثماني، ومصمم كمعظم البيوت الإسلامية القديمة اللي كانت بتسعى للحفاظ على الخصوصية وحرمة المنازل، وكان كل اللي جوا البيت يشوف اللي بره، لكن اللي بره مايقدرش يشوف اللي جوه.

    وكالة الغورى

    هي واحدة من اهم المباني اللي اتبنت في آخر العصر المملوكي، في عهد الأشرف أبو النصر قنصوة الغوري، واللي حكم مصر قبل الغزو العثماني، والوكالة موجودة في شارع الغورية عند تقاطع شارع الأزهر.

    وبتعتبر وكالة الغوري نموذج فريد للعمارة، وما زالت محتفظة برونقها بعد ما تم ترميمها وإصلاحها وعودتها لحالتها الأصلية.

    قصر عائشة فهمى

    هو قصر خاص بإبنة علي باشا فهمي، كبير ياوران الملك فؤاد، وزوجة الفنان يوسف وهبي، واتبنى القصر سنة 1907، على إيد المهندس الإيطالي أنطونيو لاشاك، والقصر مكون من دورين، الأول فيه 6 غرف، وصالة كبيرة، بيتوسطها تمثال اسمه “المفكر”، ومجموعة من اللوحات المختلفة، وفيه 3 غرف صيفية على النيل، والـ3 التانيين لفصل الشتاء.

    وفي الدور الثاني فيها الغرفة اليابانية اللي أهداها السفير الياباني لعائشة بعد ما قام بزيارتها، وكل حاجة في الغرفة من اليابان، وكمان فيها تمثاليين مطليين بلون ذهبي، ده غير غرفة الملابس الخاصة بعائشة فهمي، وكمان غرفة “الحمامات”، اللي فيها سخان بيشتغل بالغاز رغم ندرة وجوده في الوقت ده.

    بيت السناري

    ما زال موجود في حي الناصرية بالسيدة زينب، واتبنى البيت سنة 1794، واللي بناه كان “إبراهيم كتخدا السناري”، وهو من أعيان القاهرة، بالرغم من بداياته البسيطة، لإنه بدأ العمل كحارس عقار في مدينة المنصورة، ولكن قربه من الأمير مراد بك، حوله لواحد من الأثرياء.

    بيت السناري مكون من الجزء الغربي وبيشمل المقاعد وقاعات الاستقبال، والجزء الشرقي وفيه الغرف الثانوية، وله مدخل كبير حجري، وفوقيه مشربية بارزة، والمدخل بيوصلكم لفناء داخلي بيتوسطه نافورة.

     بيت الهراوي

    هو واحد من البيوت الأثرية القديمة في القاهرة، وجنب بيت الست وسيلة، وبيطل على منزل زينب خاتون، واتبنى على إيد أحمد بن يوسف الصيرفي، سنة 1731، واتنسب البيت للدكتور عبد الرحمن باشا الهراوي، سنة 1881، وهو كان آخر مالك له، وحاليًا هو مزار أثري مهم، وكمان بيتعمل فيه حفلات ثقافية وفنية بشكل مستمر.

    المنزل له واجهتين، واحدة رئيسية من الناحية الجنوبية الغربية، والواجهة التانية مجاورة لبيت الست وسيلة، وهو مكون من دورين، الأول فيه الممر وملحقاته زي الطاحونة والإسطبل وحاصل الغلال، وفناء المنزل، وقاعة المقعد الصيفي، والسلاملك، والدور الثاني فيه المندرة وسلم القاعة الرئيسية وممر، وغرفة انتظار بسقف خشبي.

    وأخيرًا..

    تقدروا تتابعوا أجندة كايرو 360 علشان تعرفوا أهم الأحداث والفعاليات اللي بتكون في الأماكن اللي فاتت دي.

    مقترح