من غير ما تتحرك من بيتك.. اكتشف أسرار وادي الملوك في جولة افتراضية مدهشة!
آثار فرعونية الأقصر الحضارة المصرية القديمة السياحة في مصر المقابر الملكية تاريخ مصر توت عنخ آمون جولة افتراضية خرائط طيبة زاهي حواس زيارة مجانية وادي الملوك
Mohamed Talaat
السفر للأقصر في الشتاء حلم عند ناس كتير، خصوصًا عشّاق الحضارة الفرعونية والآثار اللي بتحكي تاريخ مفيش زيه. بس المشكلة دايمًا بتكون في بُعد المسافة وتكاليف السفر. علشان كده، جايين نقولكم على موقع عبقري هيسهّل عليكم الموضوع ويخليكم تزوروا وادي الملوك وأنتم قاعدين في بيتكم، من غير ولا جنيه!
المشروع اسمه رسم خرائط طيبة، وابتداه عالم المصريات الدكتور كينت ويكس سنة 1987 بالتعاون مع جامعة كاليفورنيا. وبعدها اتنقل المشروع للجامعة الأمريكية بالقاهرة، وكان هدفه الأساسي هو عمل خريطة أثرية لوادي الملوك في الأقصر.
وفي سنة 2000، تم إصدار الأطلس الرسمي للموقع، لكن بعدها المشروع اتوقف بسبب نقص التمويل.
لحد ما في 2021، رجع المشروع تاني للنور بفضل تمويل من مركز الأبحاث الأمريكي في مصر، واتطوّر الموقع الإلكتروني الخاص بيه، وبقى كنز مفتوح لكل اللي بيحبوا يتعرفوا على أسرار المقابر الملكية.
وادي الملوك.. حتة من التاريخ
وادي الملوك موجود غرب نهر النيل في مدينة الأقصر، ومحفور في تلال مدينة طيبة الفرعونية. اختاروه القدماء المصريين علشان يكون مدفن لحكام الدولة الحديثة، والسبب كان عبقري: قريب من المعابد وقرى طيبة، ومنحدراته وعرة وسهلة الحراسة، وفيه صخور جيرية قوية، وفوقه جبل اسمه “القرن” كانوا بيربطوه بإله الشمس “رع”.
فيه حوالى 64 مقبرة ملكية وخاصة، مختلفة في الحجم والتصميم: من متاهات طويلة لغرف بسيطة. ولسه الاكتشافات مستمرة، وآخرهم مقبرة رقم 65 اللي اكتشفها الدكتور زاهي حواس.
لكن أشهر المقابر اللي بنعرفها لحد دلوقتي: توت عنخ آمون – يويا وتويا – ماهيربيري – أبناء رمسيس الثاني.
والمكان فيه واديين: الشرقي: الأشهر وبيضم أغلب المقابر، والغربي: أكبر في المساحة، لكنه أقل استكشافًا، وموجود فيه بس مقبرة أمنحتب الثالث ومقبرة “آي” حتى الآن
الموقع الإلكتروني.. جولة من غير شنطة سفر
من خلال الموقع الإلكتروني هتقدروا تعرفوا مكان كل مقبرة بالتفصيل، وتطلعوا على خرائط ورسومات وصور، وتشوفوا جولات افتراضية للمقابر، وكمان تعرفوا قصة كل مقبرة والشخصية اللي اتدفنت فيها حتى الآن، فيه معلومات عن 63 مقبرة، والموقع بيتحدث باستمرار.
صحيح الموقع محتاج شوية تطوير وتفاعل أكتر، لكنه بيقدّم تجربة مميزة وقريبة من الحقيقة.
وطبعًا، الزيارة الحقيقية للأقصر ووادي الملوك ليها طعم تاني، بس الموقع ده مرجع رائع لأي حد مهتم بتاريخ قدماء المصريين أو عاوز يتعرف على الآثار من غير تعب أو مصاريف.
اعرفوا أكتر عن المشروع وزوروا وادي الملوك افتراضيًا من هنا:
مقترح
معالم وسياحة
من غير ما تتحرك من بيتك.. اكتشف أسرار وادي الملوك في جولة افتراضية مدهشة!
آثار فرعونية الأقصر +10
الحياة في كايرو
