نورت مصر 2.. دليلك لزيارة وسط البلد في قلب القاهرة
أماكن وسط البلد المتحف المصري جروبي وسط البلد دليل نورت مصر سوق ديانا للتحف سينمات وسط البلد قصر عابدين كافيهات وسط البلد مطاعم وسط البلد معهد الموسيقى العربية مقهى ريش القاهرة وسط البلد القاهرة
Mohamed Talaat
الصورة الرئيسية: Alex Kotomanov
الفترة دي بتشهد مصر زيارات كتير من دول الخليج وعودة المصريين في الخارج لقضاء إجازتهم السنوية في قلب القاهرة النابض. علشان كده قررنا نساعدكم في اكتشاف القاهرة بمعالمها التاريخية والسياحية، ونقولكم على دليل متكامل لزيارة القاهرة هتلاقوا فيه أماكن مختلفة ممكن تحبوا تزوروها وتستمتعوا بيها.
خلينا نأكد في البداية إن دي مجرد ترشيحات صغيرة وسط كتير من الأماكن اللي بتميز القاهرة ومحتاجين تستكشوفها دايمًا. واحنا هنخلي الترشيحات في سلسلة ننشرها كل مرة عن منطقة محددة، علشان تقدروا ترتبوا زيارتكم طبقًا لكل زيارة تحبوا تخططوا لها.
لو حبيتوا تزوروا وسط البلد فأول حاجة لازم تمشوا في شوارعها بالليل. وكل ما كان متأخر كل ما هتكون منطقة وسط البلد أجمل. استمتعوا بتفاصيل عمارات القاهرة الخديوية وقصصها وأشكالها العمرانية الفريدة.
أماكن تاريخية
وطالما وسط البلد، يبقى أول ترشيح لازم يكون المتحف المصري بالتحرير، اللي هتستمتعوا فيه بالحضارة المصرية القديمة المبهرة. تذكرة الدخول 30 جنيه للمصري، و10 جنيه للطالب المصري، و200 جنيه للعرب، مع خصم 50% للطلبة.
كمان تقدروا تزوروا متاحف قصر عابدين التاريخي. سعر التذكرة 100 جنيه للعرب و20 جنيه للمصريين، وفيه رسوم للتصوير تبدأ من 5 جنيه لو التصوير بالموبايل.
والميزة في قصر عابدين إنكم ممكن تحجزوا غداء في الحديقة الملكية داخل القصر بحجز مسبق على رقم: 0223916909.
مايفوتكش كمان: نورت مصر: جولة في حي الجمالية.. حكايات وبيوت وأسوار ومطاعم ما تتفوتش
ثقافة وفن
لو أنتم من محبي الثقافة والفن، عندكم في شارع رمسيس معهد الموسيقى العربية اللي بيقدم حفلات متنوعة ومتميزة لفنانين مختلفين.
كمان موجود بالقرب من قصر عابدين مسرح الجمهورية بمسرحياته وحفلاته الفنية اليومية، وده غير المسرح القومي اللي بيقدم فن هادف وفكر مختلف، وخاصة لفرق الشباب المسرحية.
كمان ممكن تحضروا حفلة من حفلات مركز مولانا في شارع طلعت حرب، أو تحضروا جلسة زار في مركز مكان الثقافي بشارع سعد زغلول.
وطبعًا لو بتحبوا السينمات، هتلاقوا اختيارات كتير زي: رينيسانس، أوديون، مترو، وسينما زاوية وغيرها لحضور أهم وأحدث الأفلام، مع العلم إن الأفلام بتنزل يوم الأربعاء من كل أسبوع.
قعدة مزاج
لو حابين تاكلوا وتشربوا في وسط البلد، فالاختيارات كتير ومختلفة.
عندكم مطعم الألفي بك بالتوفيقية، وهو من المطاعم اللي ليها تاريخ كبير واتفتح سنة 1938.
مطعم فلفلة في شارع طلعت حرب، بيقدم أكلات مصرية شهيرة، ولازم تجربوا الفطار الجميل عنده، وهو تأسس سنة 1959.
زمان، الملك فاروق لما كان يحب ياكل سمك، كان بيروح على أسماك الشامي في شارع البستان (تأسس 1948)، ولسه موجود لحد دلوقتي بعد التطوير، بيقدم أكلات سمك عالمية ومميزة وبأسعار مناسبة، وشعارهم “لو مكلتش اتصور”.
ولمحبي الكشري، عندكم كشري أبو طارق في شارع شامبليون (تأسس 1950)، وعنده فرايتي مختلفة، ورغم انتشاره في بعض الدول العربية إلا إن الأصل ليه رونق خاص.
كمان فيه حواوشي الرفاعي اللي تأسس سنة 1969 وبيقدم واحد من أجمل الحواوشي المصري في القاهرة.
أما الكافيهات الجميلة:
حديقة جروبي (تأسست 1891) في شارع عدلي، مكان ممتع بيقدم حلويات وآيس كريم مميزين جدًا، ولازم تجربوا عندهم المارون جلاسيه.
الأمريكين في شارع طلعت حرب (تأسس 1943)، القعدة فيه هترجعكم لزمن جميل، ومتنسوش تجربوا الكاساتا بتاعتهم.
مقهى ريش (تأسس 1908) في شارع طلعت حرب، وكان ملتقى المثقفين والسياسيين والفنانين زمان ولسه محافظ على تاريخه ورونقه.
خلفه على طول، هتلاقوا قهوة زهرة البستان المشهورة بـ”الأحداث الكبرى”، وكانت من أهم أماكن تجمع الشعراء والفنانين والسياسيين والثوريين في مصر. رغم إنها قهوة بلدي لكنها ليها شعبية جارفة.
ومايفوتكش!
كل يوم سبت بيتعمل في وسط البلد سوق للتحف والانتيكات اسمه سوق ديانا، وده موجود خلف بنك فيصل الإسلامي بشارع 26 يوليو. حقيقي هتستمتعوا سواء بالشراء أو بمجرد الفرجة، لأن كل حاجة هناك قديمة وليها تاريخ وحكاية وقصة.
