The Definitive Guide to Living in the Capital , Cairo , Egypt

اتكلمنا في الحلقات اللي فاتت من سلسلة نورت مصر عن منطقة الجمالية العريقة، ومنطقة وسط البلد قلب القاهرة النابض، والنهارده هنتوجه لحي الدرب الأحمر اللي هو جزء لا يتجزأ عن الجمالية، واللي بيجمه عبق التاريخ وروح الحياة الشعبية، ومنطقة الدرب الأحمر مش مجرد شارع وحارة، هي كيان تاريخي أثري بيحكي قصص كتير.

حكايات تاريخية وأثرية.. السلطان حسن والرفاعي

الآثار في منطقة الدرب الأحمر متعددة العصور منها الفاطمبي والمالكي والعثماني، وبالتنوع ده بتكون من أغنى اماكن القاهرة بالآثار، وسبب تسمية الحي بـ”الدرب الأحمر” غير أكيدة، ولكن فيه روايتين هم الأقرب للتصديق وهي أن بعد مذبحة القلعة اللي عملها محمد علي الدماء سالت والأرض بقى لونها أحمر، والرواية التانية بتقول أن المنطقة بنيت بحجارة من منطقة الجبل الأحمر بالقاهرة، وهي الرواية الأقرب للتصديق.

في قلب الدرب الأحمر بندعوكم لزيارة أغلى مسجد في العالم وهو مسجد السلطان حسن “درة العمارة الإسلامية” واللي تكلف بناءه 650 ألف دينار ذهبي في وقته، وأنشأ على يد السلطان الناصر حسن بن الناصر محمد بن قلاوون خلال الفترة من ١٣٥٦ إلى  ١٣٦٣ميلادية، في عهد المماليك البحرية، على أنقاض قصر قديم كان بسوق الخيل، وبيضم مسجد ومدرسةً للمذاهب الأربعة، كما خُصص لتدريس التفسير والحديث والقراءات، بالإضافة إلى مكتبين لتحفيظ الأيتام وتعليمهم.

المسجد بيتكون من فناء “صحن” مكشوف يتوسطه فوارة وحوله 4 إيوانات و4 أبواب لكل مدرسة فقهية باب،. وبيتميز المسجد بالقباب المزين بالزخارف والتصميم المعماري المميز وبدقة الزخارف الحجرية والأشرطة الكتابية بالخط الكوفي، وأعمال الرخام وزخارف المحراب الإيواني الرئيسي ومحراب القبة، وكمان دقة التفاصيل في مدخل المنبر الرخامي ودكة المبلع ودكة المقرئ بالحشوات الهندسية المجمعة بأشكال الأطباق النجمية.

وبجواره على طول مسجد الرفاعي المميز وإنشئ في القرن التاسع عشر الميلادي، وتم تسميته نسبة لزاوية الرفاعي المدفون بيا الشيخ علي حقيد الشيخ أحمد الرفاعي وبيتميز بتصميمه المعماري المميز ودقة الزخارف على الحوائط الخارجية والأعمدة الشاهقة عند البوابة الخارجية وله مئذنتين من أجمل المآذن وأروعها، وهو أول مسجد يستخدم فيه الأسمنت بتاريخ العمارة الإسلامية، ويوجد به جزء مخصص كمقابر لأسرة محمد علي دفن فيها الخديوي اسماعيل وزوجاته ووالدته والسلطان حسين كامل وغيرهم من الملوك، وشاه إيران.

والمسجدين مقرهم في ميدان الرفاعي – الدرب الأحمر.

الطنبغا المارداني

شيد على يد السلطان الناصر محمد بن قلاوون، للأمير علاء الدين الطنبغا سنة 1340ميلادية، وموجود في شارع باب الوزير بالتبانه.

ونقل إليه من مسجد السلطان حسن الميضاة وقبة الوضوء ويتميز جدار القبلة بزخارفه المتنوعة، وبيتوسطه محراب فريد من الرخام ويجاوره منبر خشبي مزين بالأطباق النجمية المطعمة بالسن والعاج والصدف.

التكية المولوية

بتتكون التكية المولوية من ثلاث أبنية “مدرسة من العصر المملوكي”، و”تكية من العصر العثماني” و”مسرح الدراويش”، والتكية نفسها أنشأت سنة 1595 ميلاية، وكانت بتستخدم كسكن للفقراء، وتنيزت بواجهتها اللي بتجمع الطرازين العثماني والمملوكي، وكانت مقر للطريقة المولوية في القرن السابع عشر.

أما المدرسة فأنشأها الأمير شمس الدين سنقر السعدي عام 1321 ميلادية، واتعرفت باسم قبة حسن الشرابيشي، وهي عبارة عن صحن مكشوف وحاليًا الموجود منها فسقية مياه “نافورة” وبقايا غرف صغيرة كانت مخصصة للطلبة على الطراز العثماني.

وتم بناء مسرح الدراويش عام 1810 وكان اسمه “السمع خانة” وكان بيستخدم في حلثات الذكر من قبل أباع الطريقة المولوية.

وهي موجودة في شارع السيوفية – الدرب الأحمر.

الأمير طاز

تم إنشاءه على يد الأمير سيف الدين طاز سنة 1352 ميلادية، ويعتبر من أكبر المساحات وأروع النماذج لقصور دولة المماليك البحرية، وبيتميز بالفناء الداخلي الكبير وقاعاته الفريدة بزخارف متميزة، وأسقف القصر زينت بزخارف هندسية ونباتية، وجملت جدرانه بأشركة كتابية تحمل ألقاب الأمير طاز ويتخللها جامات مستديرة عليها رنك الكأس اللي بيرمز لوظيفة الساقي وهي احد وظائف الأمير طاز، وموجود في شارع السويفية.

مسار آل البيت

طالما هتزوروا الدرب الأحمر لازم تتمشوا في مسار آل البيت اللي بيضم 12 موقع أثري متميز وتم تطوير المسار وإضافة لوحات إرشادية على كل مكان أثري بداية من باب الوزير، مرورًا بمجموعة خاير بيك، والمسجد الأزرق، ومدرسة أم السلطان شعبان، وبيت الرزاز، وانتهاء بمدرسة الصالح طلائع، وكمان المسار بيضم مجموعة لمدافن آل البيت.

ثقافة وفن

بشكل واقعي خلينا نقول أن أهم مكان ثقافي وفني تقدروا تستفيدوا منه في منطقة الدرب الأحمر هي “تكية مسافر” واللي تأسست سنة 2021 وهو أول مركز ثقافي حقيقي في المنطقة، بيسافر بيكم عبر الزمن في مبنى عمره أكثر من 170 سنة، وأسس على يد شابتين من مصر ندا عز الدين وشيماء نادر، وبيقدموا ندوات وورش ثقافية وفنية، ورحلات “تعالوا نعرف مصر“، والمكان فيه قصة كفاح متميزة بتحويل شقة متهالكة إلى منبر ثقافي وفني.

وحاليًا تكية مسافر قبلة للمصريين والأجانب علشان يستمتعوا بإفطار كل جمعة، ومعرض الحرف اليدوية أول كل شهر، وندوات ومناقشات ودورات الرسم والحرف اليدوية وجلسات الحكي، مع مكتبة متميزة فيها كتب في شتى المجالات بمختلف اللغات وفيها جزء مخصص للأطفال، مع قاعة عم حربي اللي من أقدم بائعي الكتب في سور الأزبكية.

العنوان: 27 ممر 29 ميدان الرفاعي – الدرب الأحمر.

الخيامية

رغم أنه مش مكان للجلوس وخلافه إلا أنه شارع متميز هتستمعوا فيه بالورش اللي بتشتغل في شغل الخيامية وبيتفننوا في تحويل الأقمشة لمنتجات مطلوبة في كل أنحاء العالم.

طعم التاريخ في طبق

وسط الآثار المتميزة في منطقة الدرب الأحمر موجود مجموعة من المطاعم المتميزة اللي بتقدم أكلات تاريخية مكتوبة على جدرانها، ومن أهم المطاعم دي مطعم عم توفيق  للأكل البيتي والبداية خلينا نقولكم أن عم توفيق موجود من السبعينات وهو بطل من أبطال حرب أكتوبر 1973، وهتلقوه موجود وسط الحواري والبيوت القديمة وبيقدم أكلات مصرية بنفس طابع زمان والطعم بتاع الجدة هيكون موجود في كل طبق، ومتنسوش تتمشوا في الشاعر وتستمتعوا بجمال البيوت.

العنوان: الباطنية – خلف مسشتفى الحسين الجامعي – الدرب الأحمر.

الحلمية

تأسس سنة 1939 وهتاكلوا عندهم أحلى بسبوسة بشكل خاص وحلويات عمومًا ورغم افتتاح فروع كتير لهم بالقاهرة ولكننا بنعشق أننا نروح لحد عندهم علشان نطلب حلوياتهم اللي طعمها أصيل وبجودة عالية مستمرة أكتر من 85 سنة.

العنوان: 17 شارع سكة راتب – الدرب الأحمر.

البيباني

تأسس مطعم وكبابجي البيباني سنة 1802 ميلادي، وهما متخصصين في تقديم الكباب وبيتميزوا بالجودة والتاريخ العريق في المشويات، والطعم عندهم مميز وجميل وهتستمتعوا بالأكل وسط جدرانه اللي بتكتب تاريخ عظيم.

العنوان: 37 شارع القلعة – ميدان البيباني – الدرب الأحمر.

أخيرًا منطقة الدرب الأحمر مكان لازم تنسوا فيه التكنولوجيا والحداثة وتتمشوا فيه وتستمتعوا بكل تفصيلة جواه وهتحسوا أنكم رجعتوا بالزمن لقرون فاتت هتلقوا فيها روح مصر القديمة لسه عايشة بتراثها وجماله.

قطة

سنة 1947 اتأسس مطعم قطة للفول والأكلات الشعبية وأصبح المكان علامة بارزة في منطقة الدرب الأحمر والأكلات الشعبية ودايمًا بيطوروا في المكان والأكلات وبيدخلوا أصناف جديدة لدرجة أنهم أصبح قبلة للسياح قبل المصريين علشان يجربوا تاريخ قديم في أكلة.

العنوان: شارع باب الوزير- الدرب الأحمر.