The Definitive Guide to Living in the Capital , Cairo , Egypt

معالم وسياحة

25 سنة على إنشاء متحف التحنيط.. 5 معلومات عن واحد من أجمل متاحف الأقصر

التحنيط تاريخ متحف التحنيط عنوان متحف التحنيط متاحف الأقصر متاحف مصر متحف التحنيط
25 سنة على إنشاء متحف التحنيط.. 5 معلومات عن واحد من أجمل متاحف الأقصر
    بواسطة
    Mohamed Talaat

    الفترة دي، بتحتفل مصر باليوبيل الفضي لمتحف التحنيط بالأقصر، واللي بيعتبر الأول من نوعه في العالم اللي بيوثق قصة تجهيز الجسد استعدادًا للحياة الأبدية، وبمناسبة مرور رُبع قرن على افتتاحه، واللي كان تحديدًا في 7 مايو عام 1997، هنعرفكم على 5 معلومات عن المتحف ده.

    1 – بيضم متحف التحنيط مجموعة كبيرة من المومياوات للحيوانات، زي التماسيح، والقطط، والأسماك‎، كمان بيضم مجموعة من اللوحات التعريفية بأسرار التحنيط والبعث وحساب المتوفي، والوسائل اللي كانت بتستخدم في عملية التحنيط، من مواد وأدوات.

    2 – بيُعد التحنيط واحد من أسرار الحضارة المصرية القديمة، وهو بيوضح بشكل عملي علاقة المصري القديم بحياته ما بعد الموت، وبيعتبر متحف التحنيط الوحيد في العالم اللي بيهتم بعرض أسرار وطرق وأساليب التحنيط، وتم تصميمه بحيث يماثل حجرة الدفن عند قدماء المصريين، من حيث الطريق المنحدر، والأضواء الخافتة اللي بيتم تركيزها في العادة علي القطع المعروضة، وده أهله لمنافسة أفضل المتاحف الحديثة علي مستوي العالم.

    3 – من ضمن معروضات المتحف، مومياء الكاهن ماسحرتي وهو ابن الملك “با- نجم” الأول من الأسرة 21، واللي كان كبير كهنة آمون بطيبة وقائد للجيش، وهي من أهم القطع الأثرية بالمتحف كونها المومياء البشرية الوحيدة فيه، بالإضافة لأغطية مومياء وتابوت للكاهن “بادي أمون الخامس” من الأسرة 21 من الدير البحري، وتمثالين من الخشب للمعبودتين إيزيس ونفتيس، وصناديق خشبية لحفظ تماثيل الأوشابتي اللي كانت بتتواجد بأعداد كبيرة داخل المقبرة مع المتوفي.

    4 – المتحف بيضم كمان “سرير التحنيط”، واللي تم العثور عليه محطم في وادي الملوك، بالإضافة للعديد من المواد والأدوات اللي استخدمها المصري القديم في عملية التحنيط مثل “الإزميل والمطرقة”، المخصص لتفتيت المخ، وهو عبارة عن “الإسبتيولة” والملعقة للتنظيف الداخلي، والسنارة المحماة والمعقوفة، المخصصة في سحب المخ من خلال فتحة الأنف، والموس المخصص لعمل فتحة الجانب الأيسر من البطن، والمقص، والملقاط، المشرط اللي كان بيتم استخدامه في عملية فصل واستئصال الأحشاءـ والفرشاة المخصصة للتنظيف الجاف الداخلي، والمخرازة لعملية ترميم العظام عند الضرورة، وأخيرًا الإبرة اللي قاموا باستخدامها في عملية خياطة البطن، بالإضافة لملح النطرون، ونشارة الخشب، واللي كان بيتم استخدامهم كحشو مؤقت في التجويف الصدري والبطني.

    5 – المتحف بيضم مومياوات لكتير من الحيوانات والطيور المقدسة، زي طائر أبو منجل، ومومياء لقرد، والاثنين رمز للمعبود “تحوت” إله المعرفة والحكمة، ومومياء سمكة قشر بياض، ومومياء لقطة، بالإضافة إلي كبش محنط مغطى بقناع مذهب، ومومياء التمساح المحنط حديث الولادة، واللي تم جلبه من معبد “سوبك” بمدينة “كوم أمبو”.

    وأخيرًا..

    المتحف موجود على كورنيش النيل شمال معبد الأقصر، أمام جبال طيبة الغربية، وافتتح المتحف يوم 7 مايو سنة 1997م، وبتبلغ مساحته حوالي 2035 متر مربع، والمخطط العام للمتحف بيتكون من قاعة عرض واحدة بتنقسم إلي جزئين.

    المتحف متاح للزيارة يوميًا من الساعة 9 صباحًا وحتى 1 مساءً، ومن 5 مساءً حتى 8 مساءً، وأسعار التذاكر 20 جنيه للمصريين والعرب و5 جنيه للطلاب المصريين، و100 جنيه للأجانب و50 جنيه للطلاب الأجانب.

    مقترح