The Definitive Guide to Living in the Capital , Cairo , Egypt

معالم وسياحة

5 أماكن رخيصة في القاهرة لخروجة مميزة يوم شم النسيم

السيرك برج القاهرة حديقة الأزهر حديقة الحيوان خروجات دريم بارك شم النسيم
5 أماكن رخيصة في القاهرة لخروجة مميزة يوم شم النسيم
    بواسطة
    Cairo 360

    الصورة لمتحف الحيوان بحديقة الحيوان بالجيزة

    تصوير: وائل مصطفى

    أي شخص في العالم بيحاول ينفذ المعادلة الصعبة بين الجودة والسعر، والقاهريين ما يختلفوش كثير عن كده، دائمًا بنحاول شتري شقة في مكان كويس وواسعة وسعرها قليل أو نحصل على سلعة بجودة جيدة وبسعر مناسب أو نخرج في مكان ننبسط فيه وما ندفعش كثير، وده موضوعنا النهارده اللي حاولنا نرشح فيه بعض الأماكن اللي تقدروا تخرجوا فيها وتنبسطوا وفي نفس الوقت ما تصرفوش كثير.

    برج القاهرة

    برج وهرم ونيل دي كانت رسمتنا المفضلة وإحنا أطفال، وكان فيه أطفال -ضايعة ضايعة- فاكرين أن برج القاهرة من عجائب الدنيا السبعة، هو من أكبر معالم القاهرة السياحية بمكانه في جزيرة الزمالك على شكل زهرة اللوتس بارتفاع 187 متر، بنكلمكم عن برج القاهرة اللي تأسس في سنة 1961 وكان الهدف من إنشاؤه عسكري واستخدامه في الاتصالات اللاسلكية إلا أن مع تطور تكنولوجيا الاتصالات تحول استخدامها لتحفة معمارية، البرج يعتبر من الخروجات اللي سعرها مناسب، وهيخليكم تشوفوا منظر بانورامي للقاهرة ومن خلال التليسكوبات الموجودة تقدروا تشوفوا أي مكان في القاهرة زي القلعة والهرم، كمان فيه المطعم الدوار وفيه عدد من الكافيهات والمطاعم الصغيرة أمام البرج من تحت.

    ملاهي دريم بارك

    بنرشح لكم ملاهي دريم بارك في مدينة دريم لاند بالسادس من أكتوبر للمرة الثانية، دريم بارك ظهرت سنة 1999 وكانت طفرة بالنسبة لأهل القاهرة لأنها كانت متطورة بكثير عن مستوى مدن الملاهي وقتها ومازالت محافظة على المكانة دي وده بسبب أن مافيش منافسة أصلًا وبقية المدن معتمدة على الألعاب والأنشطة اللي عندها ومافيش تجديد، وبالتالي فيه إضافات بسيطة قوي على المدينة ككل، قصتنا مع دريم بارك بدأت في أيام الجامعة لما كنا بـ نشوفها على كل الحوائط “رحلة دريم بارك” وده كان بسبب سعرها المناسب واللطيف مع المتعة والسعادة في الوقت اللي بـ نقضيه فيها، أسعار التذاكر معقولة وفيه بعض الشركات والمجموعات بتقدم عروض للمجموعات بأسعار كويسة، تقدروا تتواصلوا وتعرفوا كل الجديد عن دريم بارك من خلال موقعهم الرسمي.

    حديقة الأزهر

    من وقت افتتاحها قدرت تفرض وجودها وتكون من الأماكن المفضلة عند أهل المحروسة كمكان لطيف يقدروا يؤدوا فيه عدد من الأنشطة وكمان ينفع يكون مكان للخروج وبتكلفة بسيطة، تقدروا تستمتعوا بكمية من المساحات الخضراء على مساحة 74 فدان في شارع صلاح سالم، منظر زي ده هيجري الأدرينالين في دمكم ويخليكم تنطلقوا بكل ما عندكم من نشاط، وأنتم هناك مش بس هتستمتعوا بالهواء النقي ومنظر القاهرة الإسلامية، كمان هتلاقوا عدد كبير من الأنشطة اللي دائمًا بتُقام في الحديقة زي يوم القراءة المفتوح أو حصص اليوجا المجانية أو أنشطة اجتماعية ثانية كثيرة وكل ده ببلاش، وتقدروا تشوفوا منظر مش

    كثير بنشوفه للقاهرة القديمة مع نافورات وشلالات وبحيرات صناعية كمان مع وجود عدد من المطاعم اللي بتقدم مجموعة متنوعة من الأكلات والمشروبات. تفاصيل أكثر على الموقع الرسمي وصفحة الحديقة على الفيسبوك.

    السيرك القومي

    عروض أسود وحيوانات مختلفة بالإضافة لعروض الأكروبات والترامبولين والمهرج وغيره من العروض المرحة هتلاقوها في السيرك القومي بالعجوزة اللي يعتبر من أول وأهم أماكن عروض السيرك في القاهرة ومصر، في مكانه بمنطقة العجوزة بالقرب من مسرح البالون، السيرك القومي هـ يفضل من أهم الخروجات لأهل القاهرة، مواعيد العروض من 7: 9.30 مساءً كل الأيام ماعدا الأربعاء. تقدروا تتواصلوا مع السيرك لمعرفة كل ما هو جديد عن طريق

    الاتصال بـ 0233464870 أو  0233470612.

    حديقة الحيوان بالجيزة

    لما نقول حديقة الحيوانات في الجيزة يعني الرحلة الرئيسية لأغلب مدارس مصر في مرحلة الابتدائي والإعدادي، تأسست سنة 1891 وكانت من أول حدائق الحيوانات في أفريقيا، شكلها ما تغيرش كثير عن أيام رحلات المدرسة لكنها محتاجة اهتمام أكثر عن زمان، وفيه إضافات بسيطة في وجود أنشطة جديدة للأطفال ومدينة ملاهي صغيرة قوي، سعر تذكرة الدخول 5 جنيه (فين أيام لما كانت بربع جنيه؟!) هتستمتعوا بوقت جميل ما بين أقفاص الحيوانات والطيور والزواحف المختلفة كمان مع أنواع من الأسماك والأشجار النادرة، الحديقة مش محتاجة أكثر من نصف الإمكانيات المتاحة للحدائق الأفريقية واتفرجوا عليها، تقدروا تتواصلوا مع الحديقة من خلال الموقع الرسمي أو عن طريق الاتصال

    بـ 0235708895 أو 0235701552.

    ربنا يديم علينا وعليكم الخير والسعادة يا أهل العاصمة.

    مقترح