The Definitive Guide to Living in the Capital , Cairo , Egypt

تحت مياه خليج أبو قير الهادية، وعلى عمق حوالي 10 أمتار، نايمة واحدة من أعظم المدن اللي مرت على البحر المتوسط… مدينة كاملة بحكاياتها وأساطيرها، لسه محتفظة بأسرارها من آلاف السنين. مدينة هرقليون، أو ثونيس زي ما كان المصريين القدماء بيسموها، مش مجرد أطلال غارقة؛ دي مسارح ملكية، معابد للإله آمون، سفن غارقة، وكنوز بتفسر تاريخ الإسكندرية من زاوية جديدة. وفي السطور الجاية، هتيجي معانا في جولة كاملة جوه المدينة المفقودة: من يوم اكتشافها، لحد الأسئلة اللي لسه ماحدش عنده إجابة نهائية عليها.

هرقليون… المدينة اللي اكتشفها غواصين بالصدفة في أوائل التسعينيات لما شافوا شكل غريب طالع من قاع البحر. بعدها ظهر اسم عالم الآثار الفرنسي فرانك جوديو، اللي قاد البعثة سنة 1992، وقدر يكشف إن اللي تحت المياه مش معبد ولا آثار متفرقة… دي مدينة كاملة بموانيها وتماثيلها وسفنها.

مايفوتكش كمان: القاهرة اللي تحت الأرض: رحلة جوه السراديب والخزانات وبدروم المتحف المصري في التحرير

هيرقليون كانت ميناء البطالمة الرئيسي قبل أكتر من ألفين سنة. مبنية فوق مدينة أقدم اسمها ثونيس، وكانت بوابة مصر للتجارة والاحتفالات الملكية. واللي اتكشف في الأعماق كان ضخم: أكتر من 60 سفينة غارقة، حوالي 700 مرسى بحري، تماثيل حجرية ارتفاعها يوصل لـ5 أمتار، مباني ملكية، أرضيات رخام، وعملات ومجوهرات نادرة.

ومن أكتر الحكايات اللي خطفت الأنظار، هو قصر كليوباترا الغارق. القصر اللي بيعتقد -وده غير مؤكد اكتشافه حتى الآن- كانت بتستقبل فيه زوارها وبتعمل فيه احتفالاتها الملكية، واللي لحد النهارده جزء كبير منه لسه راقد تحت المياه وسط تماثيل مكسورة وحجارة ضخمة من زمن البطالمة.

ليه غرقت المدينة؟ لسه مافيش إجابة قاطعة. احتمالات بين زلزال كبير، تسونامي مفاجئ، أو تسيب أرضي خلى المباني تنزل تدريجيًا في البحر. ورغم الأسئلة المفتوحة، كل قطعة أثرية طلعت من الموقع بتحكي إن المدينة كانت في قمة ازدهارها قبل ما تختفي فجأة.

وفيه أسطورة لطيفة بتتكرر… ناس بتربط بين تمثال أسد كان موجود في قصر كليوباترا وبين الأسد اللي بيظهر في شعار الدوري الإنجليزي. الفكرة جذابة بس مافيش دليل أثري عليها، لكنها بتدي بعد خيالي بيزود سحر المدينة المفقودة.

لو رحت الإسكندرية، خصوصًا في أبو قير أو الميناء الشرقي، تقدر تعمل رحلات غوص استكشافية وتشوف جزء من المدينة بنفسك. أو تزور المتحف القومي للإسكندرية اللي بيعرض تماثيل ضخمة تم انتشالها من تحت المياه لسيرابيس وكليوباترا، قطع ملكية، وخرائط بتوضح مواقع المباني اللي لسه نايمة تحت البحر.

هيرقليون مش مجرد آثار غارقة… دي قصة مدينة كاملة اتدفنت بالصدفة، ولسه لحد النهارده بتكشف أسرارها واحدة واحدة. والسؤال اللي لسه مفتوح: هل قصر كليوباترا الحقيقي لسه مستني اللي يكتشفه؟ يمكن تكتشفه بنفسك في رحلة غوص هناك.. في المدينة الغارقة!