أفلام لازم تتفرج عليها في شهر أكتوبر
Mohamed Hamdy
للأسف الشديد جيلنا الحالي لم يحضر حرب أكتوبر 1973 ولم يشعر بلذة الانتصار بعد سنين من الشعور بالذل والمهانة. وللأسف الأشد الجيل اللي حضر الحرب بدأ يتسرب من بين أيدينا بفعل التقدم في العمر. علشان كده لو نفسنا نعيد شعور الانتصار بداخلنا ونستعيد ذكريات انتصارنا العسكري اللي بتوافق ذكراه اليوم، ما فيش قدامنا غير ذاكرة الشعوب الحقيقية واللي مش بتنسى أو تنتهي… السينما.
هنقدم لكم مجموعة من الأفلام المتميزة اللي تناولت حرب أكتوبر 1973 علشان تستعيدوا معاها ومعانا ذكرى معركة العزة والكرامة.
الرصاصة لا تزال في جيبي
لا يمكن نتكلم عن أفلام حرب 1973 بدون ما نتكلم عن فيلم الرصاصة لا تزال في جيبي. الفيلم باختصار هو أضخم إنتاج عربي تم تقديمه عن حرب أكتوبر، وتم تصوير الفيلم والانتهاء منه أثناء أحداث الحرب نفسها. لأن النسخة الأصلية من الفيلم كانت بتدور عن فترة حرب الاستنزاف، لكن مع قيام الحرب تم استكمال التصوير وإضافة مشاهد الحرب للفيلم علشان يخرج بالصورة النهائية اللي بنشوفه بيها.
الفيلم من تأليف إحسان عبد القدوس وإخراج حسام الدين مصطفى، وتم الاستعانة بالمنتج رمسيس نجيب علشان يكتب سيناريو مشاهد الحرب فقط، والفيلم نفسه اعتمد على فكرة الإسقاط السياسي علشان يقدم لنا قصة محمد (محمود يس) المجند البسيط اللي بيشارك في معارك أكتوبر بدون ما ينسى تاره البايت مع عباس (يوسف شعبان) اللي بيستغل غياب محمد علشان يتزوج حبيبته (نجوى إبراهيم).
مشاهد الحرب في الفيلم بتستمر لفترة طويلة جدًا وبتستعرض معارك حقيقية حصلت في الحرب زي معركة تحرير مدينة القنطرة أو حرب الدبابات، وطبعًا مشاهد العبور وتحطيم النقط الإسرائيلية الحصينة وغيرها، وتم الاستعانة بـ 8 مخرجين مساعدين لتقديم المشاهد بأفضل صورة، بالإضافة لفريق عمل أجنبي لعمل المونتاج وتصميم مشاهد المعارك.
شاهد الفيلم من هنا
أبناء الصمت
الفيلم مش بس بيكتفي برصد الأحوال على الجبهة من بعد حرب الاستنزاف وحتى معركة النصر، لكنه بيقدم رصد للمجتمع المدني المصري كمان من خلال رئيس تحرير بيدور على مصلحته وبس، ومابين مواطنين تانيين متلهفين على النصر والدخول في الحرب.
الفيلم من تأليف مجيد طوبيا وإخراج محمد راضي وبطولة أحمد زكي ومحمد صبحي وميرفت أمين ومحمود مرسي. واحتل المركز 74 في قائمة أفضل 100 فيلم في ذاكرة السينما المصرية.
شاهد فيلم أبناء الصمت من هنا
العمر لحظة
الفيلم يعتبر واحد من سلسلة أفلام أنتجتها الفنانة ماجدة في محاولة منها لاقتحام عالم الإنتاج السينمائي في مصر، أما الفيلم نفسه فبيحكي عن صحفية بتقرر تسيب عالم الصحافة وتبذل مجهودها في رعاية مصابين الحرب من الجنود والظباط، وكمان بتسافر على الجبهة علشان تكون وسط الجنود وتعايش بنفسها أجواء المعركة.
الفيلم من تأليف عطيه محمد وسيناريو وجيه نجيب وإخراج محمد راضي اللي واضح أنه كان المخرج الرسمي لأفلام حرب 1973!
لكن للأسف الفيلم اتمنع من العرض في فترة معاهدة السلام مع إسرائيل وده تسبب في خسائر فادحة للفنانة ماجدة منتجة العمل، وساعد على زيادة الخسائر تسريب الفيلم على شرائط فيديو. لكنه حقق نجاح جماهيري ضخم.
أيام السادات
لا يمكن ننسى البطل السياسي في حرب 1973 الرئيس الراحل أنور السادات، خاصة أنه تم اغتياله على يد الجماعات المتطرفة في نفس التاريخ 6 أكتوبر سنة 1981 أثناء الاحتفال بذكرى الانتصار. علشان كده بنرشح لكم للمشاهدة فيلم أيام السادات، واللي من بطولة أحمد زكي ومني زكي وميرفت أمين، ومن إخراج محمد خان.
على الرغم من تعرض الفيلم لفترة حرب 1973 لكن مش بنشوف كتير من مشاهد القتال فيه، لكنه بيهتم أكتر بالدوافع السياسية وكواليس المشهد العسكري، وطبعًا بنشوف تطور شخصية السادات منذ بداية نضجه وحتى اغتياله في حادث المنصة الشهير.
الطريق إلى إيلات
وهو واحد من أشهر الأفلام في تاريخ السينما المصرية، وبيجسد دور المخابرات المصرية في الإعداد للحرب من خلال تنظيم خطة محكمة لضرب أهداف بحرية إسرائيلية من خلال عملية جريئة للضفادع البشرية المصرية، واللي قدرت تتسلل حتى حدود إسرائيل وتنفذ عمليتها رغم الصعوبات والمشاكل.
الفيلم من إخراج إنعام محمد علي ومن بطولة نبيل الحلفاوي وعزت العلايلي وعبد الله محمود وصلاح ذو الفقار.
ومشهور عن الفيلم أن أبطال العملية الأصلية كانوا بيزوروا فريق العمل باستمرار علشان يحكوا لهم ذكرياتهم مع العملية ويعرفوهم إزاي يأدوا أدوارهم على أكمل وجه.
مقترح
معالم وسياحة
أفريكا سفاري بارك.. رحلة عائلية ممتعة وسط الحيوانات
أفريكا سفاري بارك أفريكانو بارك +4
كتب
