The Definitive Guide to Living in the Capital , Cairo , Egypt

كتب: محمد صبري

بعيدًا عن الخروجات والحفلات، في ناس بتحب تقضي وقتها في السينما والأفلام. وفي الويك إند ده هتكون السينمات بتعرض 3 من أقوى أفلام شهر مارس على الإطلاق. واللي نالت إعجاب ناس كتير في العالم. تعالوا نتعرف عليهم:

Logan

شهر مارس بدأ أقوى بداية بعرض فيلم “Logan”، للنجم “هيوجاكمان”. ورغم إنه يعتبر الجزء الثامن من سلسلة x-men، إلا إنه مستقل بذاته عن الأجزاء اللي فاتت. بتدور أحداثه في المستقبل، تحديدًا عام 2029. لما بيكون كل المتحولين خلاص اختفوا من على الأرض. وبيظهر فيه لوجان أو “وولفرين” وهو كبير في السن. وقوته أقل من الأول، وده بيبان في علامات الجروح على جسمه. وبيكون كل هدفه أنه يهتم بالبروفيسور “تشارلز إكزافيير” أو بروفيسور إكس. بعد ما هو كمان كبر في السن وقوته بتقل. لكن كل حياته بتتقلب جحيم لما بتظهر البنت الصغيرة “لورا” أو X-23.

Kong: Skull Island

شركة وورنر بروس، بتعيد أسطورة السينما الأصلية “كونج”، في نسخة جديدة من إخراج: جوردن فوت روبرتس. وبطولة: توم هيدلستون، بري لارسون، سامويل إل جاكسون. الفيلم بيدور عن رحلة استكشافية بيقوم بها مجموعة من العلماء والمستكشفين، لأحد الجزر المجهولة في المحيط الهادي. غير مدركين إنهم دخلوا المنطقة اللي بيعيش فيها “كونج”. وهنا رحلتهم بتاخد سكة مختلفة، ويبدأ صراعهم للبقاء والهروب من كائنات مخيفة بتحاول قتلهم. الفيلم معروض بتقنية 3D.

Beauty and the Beast

الفيلم بيتناول قصة ديزني الشهيرة. عن الأميرة “بيلا” اللي بتقع سجينة في قلعة الوحش. رغم خوفها من الخطر بتقدر تصاحب أدوات القلعة المسحورة، زي البراد والشمعدان والساعة. ومع الوقت بتكتشف القلب الطيب والروح الجميلة للوحش، وبيحبوا بعض. الفيلم معروض بتقنية 3D.

تقدروا من خلال “السينمات” على موقعنا كايرو 360، تعرفوا أماكن ومواعيد عرض كل الأفلام.

يا ترى هتتفرجوا على إيه؟؟؟؟