The Definitive Guide to Living in the Capital , Cairo , Egypt

يمكن من قبل بداية فعاليات مهرجان القاهرة السينمائي الدولي في دورته الـ 41 واللي بتحمل اسم الناقد المصري الراحل “يوسف شريف رزق الله” المدير الفني السابق لمهرجان القاهرة السينمائي الدولي واحنا بنتكلم عن إن الدورة دي من المهرجان “استثنائية” و”مختلفة” في كل حاجة عن الدورات اللي فاتت.

ومن أكتر الحاجات اللي لفتت انتباهنا في الدورة الحالية للمهرجان هو البرنامج الضخم اللي بيضم حوالي 150 فيلم هتعرض خلال 9 أيام، منهم 35 فيلم بيعرضوا عالميًا لأول مرة في القاهرة، وهتستقبلها دور عرض مخصصة للمهرجان في دار الأوبرا المصرية ، وسينما الزمالك وسينما كريم في شارع عماد الدين في وسط البلد.

وبالمناسبة دي حبينا نقدم لكم ترشيحاتنا لـ 5 أفلام مهمة هتعرض في فعاليات المهرجان، ومش هتندموا لو اتفرجتوا عليها لإنها تستحق المشاهدة:

1. The Irishman:

 

هو فيلم افتتاح الدورة الـ 41 من المهرجان، وهو من إنتاج “نيتفلكس” وأخرجه للنور المخرج الأمريكي “مارتن سكورسيزي” بعد محاولات استمرت عشر سنين، وبيجمع في بطولته عمالقة السينما الأمريكية زي “روبرت دينيرو” و”ألباتشينو” و”جو بيشي”.

ميزانية الفيلم تجاوزت الـ 160 مليون دولار أمريكي، وهيتقدم في عرض خاص الأربعاء 20 نوفمبر، وبعدها هيعرض للجمهور مجانًا يوم الخميس 21 نوفمبر الساعة 12:30 الظهر على المسرح الكبير في الأوبرا، لكن التذاكر هتتوزع في الأوبرا برده من الساعة 9:30 الصبح، العرض مجاني أه بس مفيش دخول من غير تذاكر، فخلوا بالكم.

 

2. The Lighthouse:

 

 دراما نفسية هنختبر فيها حدود العقل البشري، بيقدمها لنا المخرج “روبرت إيجرز” بعد فيلمه الأول كمخرج وسيناريست “The Witch” ومن بطولة “روبرت باتينسون” و”ويليام ديفو”.

فيلم The Lighthouse فاز بجائزة الاتحاد الدولي لنقاد السينما من مهرجان كان السينمائي 2019، وهيعرض عرض أول يوم الأحد 24 نوفمبر 9:30 مساءً في المسرح الكبير، أما العرض الثاني فهيكون يوم الإثنين 25 نوفمبر الساعة 6 مساءً في سينما الزمالك.

 

3. احكيلي – Let’s Talk:

 

 

كنا اتكلمنا عن فيلم “احكيلي” قبل كده في موضوع منفصل على كايرو 360 باعتباره أول فيلم وثائقي مصري يشارك في مهرجان القاهرة السينمائي، وأول فيلم مصري يشارك في المسابقة الرسمية للمهرجان السنة دي.

الفيلم للمخرجة المصرية “ماريان خوري” قريبة وشريكة المخرج الراحل “يوسف شاهين” في كتير من أفلامه، وصاحبة مبادرة إنشاء وإدارة سينما “زاوية”، وكان ليها الفضل في نجاح “بانوراما الفيلم الأوروبي” اللي شاركت في إدارته.

رحلة إنسانية لأربع سيدات من أربع أعمار أو أجيال مختلفة، الرابط اللي بينهم إنهم قرايب “يوسف شاهين” والأحداث بتدور في قالب حواري في جلسة دردشة بين أم وبنتها، والاتنين بيشتغلوا في مجال السينما، وبتقوم بدور الأم مخرجة الفيلم “ماريان خوري” والبنت هي بنتها “سارة” اللي بتدرس السينما في كوبا.

 

العرض الأول للفيلم هيكون يوم الإثنين 25 نوفمبر، الساعة 6:30 مساءً في المسرح الكبير في دار الأوبرا، والعرض الثاني هيكون يوم الثلاثاء 26 نوفمبر الساعة 4:30 العصر في سينما زاوية.

 

4. It Must Be Heaven:

 

المخرج الفلسطيني “إيليا سليمان” ببساطة شديدة بيقدم لنا تحفة سينمائية، بتكتب له شهادة بإنه بقى واحد من أبرز وأكثر صناع السينما ابتكارًا، وده لإننا هنشوف في فيلمه “It Must Be Heaven” سخرية إنسانية من نوع مختلف.

الفيلم خد إشادة خاصة من لجنة تحكيم مهرجان كان السينمائي الدولي 2019، وهيعرض مرتين خارج المسابقة الرسمية للمهرجان، المرة الأولى يوم الإثنين 25 نوفمبر في المسرح الكبير في دار الأوبرا المصرية الساعة 10 مساءً، والمرة الثانية يوم الثلاثاء 26 نوفمبر الساعة 6:30 مساءً في سينما الزمالك.

 

5. Vitalina Varela:

 

الفيلم البرتغالي “Vitalina Varela” للمخرج البرتغالي “بيدرو كوستا” بيقدم لنا حكاية سيدة مهاجرة من جمهورية “الرأس الأخضر” هترجع للشبونة علشان تدفن جوزها اللي كان سايبها أصلًا من سنين، وهنا احنا بنقف قدام مكس ما بين الواقعية والخيال والرعب والروحانيات، وقصة بتنسجها سيدة معاها جنسية بلد كانت استقلت عن البرتغال في السبعينيات.

الفيلم خد تقريبًا كل جوائز مهرجان لوكارنو السينمائي الدولي 2019، ففاز بجائزة أفضل فيلم، وجائزة أفضل ممثلة، بالإضافة لجائزة لجنة التحكيم، وده كله قبل ما يحقق جائزة أفضل فيلم في مهرجان شيكاغو السينمائي الدولي.

ممكن تتفرجوا على الفيلم خارج المسابقة أول مرة يوم الخميس 21 نوفمبر، الساعة 2:30 ظهرًا بالمسرح الصغير بدار الأوبرا، وهيعاد عرضه يوم الجمعة 22 نوفمبر، الساعة 7 مساءً في سينما زاوية.