تعبت من كوكب الأرض؟.. 9 أفلام عن نهاية العالم لازم تتفرج عليهم
Cairo 360
كتب: محمد فاروق عبد الرحمن
حاسس إن العالم بقى ظالم؟ نشرات الأخبار بقت تخوف؟ العالم مابقاش مكان آمن للناس الطيبة اللي زيك؟ طب ساعات بيبقى نفسك تشوف عاليها واطيها وتقول “أشوفها بتولع” بصوت القرموطي (الشخصية مش المذيع، معلش إحنا بنتكلم يعني). كايرو 360 عملتلك ليستة أفلام ومسلسلات تشوفها وتستمتع برؤية زوال الحياة البشرية من على هذا الكوكب البائس.
دي “الأبوكاليبس يا جماعة” حاجة كدا مفتخرة، يعني زومبيز وخناقات وفضائيين وكوارث وحروب وليلة كبيرة أوي. بعض الأفلام في القايمة دي ممكن تجيب لك اكتئاب، فالأحسن تشوف بعدها على طول فيلم كوميدي أو رومانسي يخليك تحب الحياة من تاني، لكن الليستة فيها كمان أفلام تانية ممكن تضحكك، وغيرها ممكن تخليك تحمد ربنا على النعم اللي أنت متنغنغ فيها ومش حاسس!
جهز فِشَارَك بقى يا عمونا أو يا ستنا وهي بنا نتفرج عالمدينة وهي بتتحرق.
رقم 09
Dawn of the Dead -2004
ضرب نار، دم، سكاكين ورشاشات وعربيات، وزومبيز بالعبيط. دي نهاية العالم يا جماعة، بس الحق يتقال الفيلم حلو كجرعة إدرينالين والمشاهد فيه متنفذة بحرفنة.. ما تقلقوش يعني أصله من إخراج “زاك سنايدر” اللي عمل باتمان وسوبرمان، وجاستس ليج و 300، يعني راجل بيفهم مش أي كلام.
رقم 08
28Weeks Later
بعد 28 أسبوع قضت فيها القوات الدولية على آثار فيرس مدمر انتشر في المملكة المتحدة، بيعود الإنجليز إلى بلادهم بعد ما كانوا لاجئين حول العالم. يا ترى الفيرس انتهى واختفى فعلا ولا لأ؟
الفيلم من إخراج «خوان كارلوس فريساندلو».
رقم 07
28Days Later
هو يعتبر الجزء الأول للفيلم اللي قبليه في القايمة بتاعتنا. بس الفيلمين مش مرتبطين ببعض في القصة هي الأحداث اللي بتدور في نفس العالم. ممكن تقول عليه أصل القصة. الأحداث بتدور في لندن بعد 28 يوم من وباء غريب انتشر في انجلترا وخلى البشر يتصرفوا بشكل غريب أوي ويبقوا زومبيز.
الفيلم ده من أحلى أفلام الفيروسات القاتلة اللي بتغير شكل الأرض على الإطلاق، مليان أكشن ومفاجآت ومحبوك جدًا. الفيلم من إخراج «داني بويل» (اللي أخد أوسكار عن فيلم «سلامدوج مليونير» بعد كده).
رقم 06
Z for Zachariah
أنا سمعت حد قال هو كله زومبي زومبي مافيش دراما؟! ده أنتم هتتهروا دراما، عايز دراما.. خوووود.
تخيل كده يا عزيزي تلك القطة الجامحة “مارجو روبي” اللي جسدت هارلي كوين في فيلم «سواسايد اسكواد» قاعدة في بيت جميل في تلة خضرا لوحدها، والبشرية راحت، الرجالة انعدمت، والهوا مابقاش نضيف، وما فضلش غيرها وراجلين بس، يا ترى مين فيهم يكسب؟
رقم 05
10Cloverfield Lane
واحدة بتعمل حادثة بعربيتها، بتفوق تلاقي نفسها في أوضة أسمنتية تحت الأرض مع رجلين وواحد منهم بيقولها إن الحياة انتهت على كوكب الأرض وإنه انقذها لما اخدها في المخبأ السري بتاعه اللي عمله علشان يواجه بيه نهاية العالم. طب هو العالم انتهى ولا دي اشتغالة ولا إيه؟
المنتج المنفذ للفيلم هو «ج. ج. أبرامز» (اللي أخرج «ستار وورز ذا فورس أويكنس» و «ستار تريك» وأنتج مسلسل «وست وورلد» وعمل مسلسل «لوست»).
رقم 04
The Road
الفيلم ده بقى مابيحاولش يخلي نهاية العالم حاجة مبهرة وتستمتع بيها. ده بيعيشك فيها. بياخد من إيدك ويمشيك مع أب وابنه الصغير على طريق، بعد ما اتدمرت الحضارة البشرية واختفت الموارد، والناس فعليًا بقت بتقطع بعضها علشان تعيش. مفيش زومبيز، مفيش انفجارات، فيه بؤس وخوف بس.
الفيلم بطولة «فيجو مورتينسن» (بطل «لورد اوف ذا رينجس» و «كابتن فانتاستيك»).
رقم 03
Shaun of the Dead
الفيلم ده كوميدي وابن ناس أوي في معالجته لمسألة نهاية العالم ويعتبر تريقة على أول فيلم كان معانا في القايمة. بتدور أحداثه في إنجلترا لما بيجتاح العالم وباء بيحول الناس لزومبي بياكلوا بعض، وكل هَمْ “شون” في وسط الأحداث دي إنه يرجع صاحبته القديمة “الإكس” ويصلح علاقته بأمها، ويلاقي ملاذ آمن من الموتى الأحياء.
الفيلم من إخراج «إدجار رايت» اللي كتبه بالاشتراك مع بطل الفيلم «سايمُن بِج».
رقم 02
Zombieland
مسخرة كاملة ومكتملة الأركان، الفيلم عبارة عن دليل المبتدئين لمواجهة نهاية العالم في شكل زومبيز. يعتبر خاتمة حلوة لكل أفلام الرعب والأكشن بتاعت الزومبيز اللي كانت في القايمة، اعتبرونا بندلعكم علشان هو مليان أبطال معروفين زي «جيسي إيسنبرج» (سوشال نتورك، وباتمان وسوبر مان) والفاتنة «ميلا كوينس» (فرندس وذ بنفتس) والمشهد العظيم لـ«وودي هارلسُن» اللي اتعمل «ميم» عالانترنت وهو بيمسح دموعه بورق دولارات كتير.
رقم 01
The World’s End
الناس اللي سابت بلادها ولفت وسافرت هتعرف تحس بحاجة في الفيلم ده، تخيل لما تتلم مع أصحاب زمان وترجعوا مدينتكم الصغيرة علشان ترجعوا الذكريات وتتشاقوا زي زمان. حاجة جميلة مش كده؟!
بس يا ترى فيه إيه بيحصل في المدينة الكيوت الهادية دي؟ وليه الناس بقت غريبة؟ وهل دي نهاية العالم ولا إيه؟
فيلم كوميدي تاني من إبداع «إدجار رايت» و «سايمُن بِج».
مشاهدة سعيدة
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
