دليلك لكل أفلام عيد الأضحى 2017
Mohamed Hamdy
كل سنة وأنتم طيبين، ولو حد قال لكم أن عيد الأضحى هو عيد اللحمة، ودي هي الجملة الأولى اللي بتتقال كمحاولة للتهرب من دفع العيدية.. في الحالة دي لازم تقاتلوا علشان تاخدوا العيدية بتاعتكم.. علشان فيه 7 أفلام عربية هتتنافس على العيدية بتاعتكم السنة دي في موسم عيد الأضحى.. تعالوا نتعرف عليهم أكتر.
الكنز
مش بس واحد من أهم الأفلام في عيد الأضحى، لكنه ممكن يبقى واحد من أهم الأفلام في تاريخ السينما في مصر. لأنه معتمد على فكرة الأفلام المكونة من مجموعة أجزاء وهي فكرة جديدة على السينما المصرية، وثانيًا لاشتراك عدد كبير من النجوم في بطولة زي هند صبري وروبي ومحمد سعد ومحمد رمضان وهاني عادل وهيثم أحمد زكي وغيرهم.
الفيلم بيتنقل بينا بين مجموعة من العصور وبيتتبع قصة حياة مجموعة من الأشخاص عبر العصور دي وإزاي بيتفاعلوا مع بعض. والقصة فيها جزء كبير من الغموض وعدم الوضوح.
الكنز من تأليف شريف عرفة وسيناريو وحوار عبد الرحمن كمال ومن إخراج شريف عرفة.
إعلان الفيلم
الخلية
من أفلام الأكشن اللي سمعنا عنها كلام كتير في الفترة اللي فاتت. الفيلم بيحكي عن ظابط في العمليات الخاصة بيقوم بمجهودات كبيرة لمكافحة الإرهاب، والفيلم بشكل عام بيعرض الجهود الكبيرة اللي بتبذلها الوحدات دي للحفاظ على أمن البلد والناس.
الخلية من تأليف صلاح الجهيني ومن إخراج طارق العريان وبطولة أحمد عز ومحمد ممدوح وسامر المصري وأمينة خليل.
إعلان الفيلم
خير وبركة
نجم مسرح مصر على ربيع بيستغل نجاحه وبيقدم لنا فيلم كوميدي مع تارا عماد ومحمد عبد الرحمن ومي سليم، عن أخين بيدوروا على فرصة عمل وبيواجهوا سلسلة لا تنتهي من المواقف الكوميدية أثناء البحث عن شغل.
الفيلم من إخراج سامح عبد العزيز ومن تأليف جورج عزمي، وفكرة الفيلم من نصيب على ربيع برضه.
إعلان الفيلم
شنطة حمزة
جولة في عالم النصب بياخدنا لها حمادة هلال من خلال أحدث أفلامه السينمائية شنطة حمزة.. الفيلم بيحكي عن شاب متخصص في النصب بيتعرف على بنت بتشتغل في نفس المجال ولها شخصية قوية. يا ترى إيه ممكن يحصل بينهم؟
الفيلم من تأليف أحمد عبد لله وإخراج أكرم فاروق وبطولة حمادة هلال وسامية الطرابلسي مع بيومي فؤاد ومحمد ثروت.
إعلان الفيلم
بث مباشر
ومن الكوميديا للأكشن، فارس ظابط شرطة موقوف عن العمل، بيتعرض خلال ليلة واحدة فقط لكمية كبيرة من الضغوط والمشاكل والحوادث واللي بيتم بث أحداثها كلها على السوشيال ميديا علشان تحقق أعلى نسب مشاهدة، ومن خلال الحوادث دي بنبدأ نكتشف مجموعة كبيرة من قضايا الفساد في البلد.
الفيلم من تأليف طارق رمضان وإخراج مرقس عادل وبطولة سامح حسين وطاهر أبو ليلة ومصطفى عباس وأيمن منصور.
أمان يا صاحبي
فيلم غنائي خفيف من بطولة سعد الصغير ومحمود الليثي، بيحكي عن أتنين مافيش معاهم فلوس بيضطروا يتزوجوا بنتين من أسرة غنية. ومن هنا بتبدأ سلسلة من الأحداث الكوميدية تحصل لهم.
الفيلم من إخراج هاني حمدي وتأليف سيد السبكي وبيشارك سعد الصغير ومحمود الليثي البطولة عبد الباسط حمودة والراقصة صوفينار.
إعلان الفيلم
هروب مفاجئ
من الأفلام اللي كانت مؤجلة لفترة طويلة ثم ظهرت أخيرًا للنور. فيلم “هروب مفاجئ” بطولة أشرف مصيلحي وساندي ونرمين ماهر وحسام فارس ومراد فكري.
الفيلم سيناريو وحوار سامح فرج، وإخراج إبرام نشأت وبيحكي عن الأثار السلبية اللي ممكن تحصل لمجموعة شباب لما يفشل أهلهم في تربيتهم بشكل صحيح.
إعلان الفيلم
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
