The Definitive Guide to Living in the Capital , Cairo , Egypt

السينما فى مصر فن وتجارة وشطارة.. وبين الأحداث السياسية الساخنة اللى بـ نشهدها مؤخرًا، وتأثيرها المباشر على صناعة السينما فى مصر، واضطرار المخرجين لتغيير مواعيد طرح الأفلام فى السينمات بسبب تأخر التصوير وباقى الخدمات الإنتاجية، على الرغم من اقتراب موسم عيد الأضحى المبارك اللى بـ يعتبر موسم متميز ومشهور لتقديم الأفلام السينمائية العربية، وسط كل الأحداث دى حبينا نكلمكم عن أحدث وآخر الأخبار السينمائية فى مصر.

 

فى الفترة الأخيرة ترددت أخبار قوية عن العمل على الجزء الثانى من فيلم “الجزيرة” بطولة أحمد السقا وهند صبرى ومجموعة من أفضل الفنانين فى مصر، يا ترى فاكرين الجزء الأول؟ الفيلم اللى تم اعتباره واحد من أفضل الأعمال السينمائية اللى تم إنتاجها فى مصر فى  السنوات القليلة الماضية واللى لسه قادر على جذب نسبة كبيرة من المشاهدة والإعلانات عند عرضه على الفضائيات.

شريف عرفة مخرج الفيلم قال فى حوار مع جريدة الشروق أنه من المستحيل استبعاد هند صبرى من بطولة الجزء الثانى من الفيلم، ونفى الشائعات اللى كانت ترددت بقوة مؤخرًا عن  اعتذار هند عن المشاركة فى الفيلم، وفى نفس الوقت ترددت أخبار عن مشاركة الأخوين خالد ومحمد دياب فى كتابة السيناريو.

الفيلم بـ يحكى عن هروب أحمد السقا من السجن بشخصية (منصور الحفنى) وقدرته على تشكيل تنظيمات عصابية وعلاقتها بأحداث ثورة 25 يناير وغيرها من الأحداث الجارية اللى هـ يتناولها الفيلم اللى نتمنى له النجاح إن شاء الله.

 

نسيب السقا ونتكلم عن نجم ما يقلش كثير عنه.. هانى سلامة، بعد نجاح مسلسل “الداعية” اللى تم عرضه فى رمضان الماضى توارد أنه مقبل على الدخول فى تصوير فيلم جديد هو “الراهب” من إخراج المتميزة هالة خليل.

الفيلم بـ يحكى عن شاب بـ يلجأ لحياة التدين بعيدًا عن مظاهر الدنيا الخادعة وبـ يفكر فى الالتحاق بحياة الرهبنة فى الدير، لكن توارد عدد من الأخبار أكدت أن الفيلم متأخر فى التصوير بتاعه بسبب ظروف سفر هانى للولايات المتحدة، والمفروض أن الفيلم باقى حوالى 80% من مشاهده لم يتم تصويرها، ومن المقرر استكمال تصويره مع بداية شهر أكتوبر، الراهب هو الفيلم  اللى نتوقع له إثارة حالة من الجدل فى الشارع المصرى اللى مش بـ ينتهى من الجدلين السياسى والدينى.

 

بعيدًا عن الجدل والاختلافات اللى بـ نشوفها كل يوم.. علا غانم وعمرو عبد الجليل، من الواضح أن فيه “كيميا” بينهم فى الشغل السينمائى، لأن بعد مشاركتهم مع بعض فى مسلسل “الزوجة الثانية” اللى عُرض فى رمضان الماضى وما حققش نجاح كبير قرروا أنهم يعيدوا التجربة من خلال فيلم سينمائى المرة دى بـ يحمل اسم “كلاكيت”.

كلاكيت كتب قصته وبـ يخرجه بيتر ميمى، وسيناريو وحوار محمد علام وبـ يحكى عن قصة عامل كلاكيت بسيط ومحاولته للكفاح وسط ظروف الحياة المختلفة، بـ يشارك عمرو عبد الجليل وعلا غانم فى البطولة الفنانة راندا البحيرى ونضال نجم وأحمد فؤاد سليم.

 

ومن الأفلام اللى بـ يتم تصويرها اليومين دول رغم ظروف حظر التجول فيلم “القشاش”، وهو الفيلم اللى من المتوقع أن دور العرض السينمائى فى مصر تستقبله فى عيد الأضحى القادم. من بطولة محمد فراج وحورية فرغلى، وبـ يحكى عن قصة مجرم هارب من جريمة قتل وبـ تساعده راقصة شعبية (حورية فرغلى) للهروب من المشاكل اللى بـ يقع فيها.

حورية شوفناها قريبًا فى موسم عيد الفطر فى فيلمين، الأول هو “نظرية عمتى“، والثانى هو “قلب الأسد” اللى شاركها البطولة فيه الفنان محمد رمضان.

 

آخر خبر عاوزين نختم به، فرصة لأنه خبر جميل، فاكرين فيلم عشم؟ الفيلم هـ يشارك فى عدد من المهرجانات الدولية فى السويد والمغرب.

المشاركة قوية والأفلام اللى بـ تنافس عشم قوية ومش سهلة، خصوصًا أنه التجربة الأولى فى الإخراج الطويل لمخرجته ماجى مرجان، لكن كلنا “عشم” أن الفيلم يحقق نجاح كبير فى كل المهرجانات الدولية اللى هـ يخوضها.

 

واقع جديد بـ يفرض نفسه على السينما المصرية، سواء الواقع السياسى اللى بـ يفرض متغيرات جديدة على السينما المصرية كفن، أو المتغيرات الأمنية من حظر تجول وخلافه اللى بـ تفرض متغيرات أكثر قوة على السينما كصناعة… ربنا يستر.