The Definitive Guide to Living in the Capital , Cairo , Egypt

أحيانًا قضايا زي الحفاظ على البيئة والتلوث والمشاكل اللي ممكن تحصل للبشر من وراه مش بتاخد اهتمامنا بشكل كبير، على الرغم من إن المشاكل دي بتأثر على حياتنا حتى لو على المدى البعيد زي مشكلة التغير المناخي، واللي بنلاحظ تأثيرها على الجو عندنا في الفترة الأخيرة.

في Dark Waters بنشوف كفاح محامي في رفع قضية على شركة ضخمة بيتهمها فيها بتلويث البيئة والتسبب في مشكلات ضخمة – مش عاوزين نحرقها عليكم – وبنشوف إزاي ممكن الشركات دي تحاول تخلي أي شخص يقف في وشها يدفع الثمن غالي.

من أجمل الحاجات اللي لاحظناها في الفيلم كانت الأداء التمثيلي لـ “مارك روفالو” و”آن هاثاواي” و”تيم روبنز” و”بيل كامب” واللي قدموا كلهم حالة استثنائية من التناغم بينهم، كانت ظاهرة بوضوح على الشاشة، وتستحق كل التقدير والاحترام لموهبتهم واحترافيتهم العالية.

الجميل كمان في الفيلم إننا مش هنشوف شرير واضح في الأحداث، لكن هنشوف ازاي الشرير ممكن ميكونش شخص بقدر ما يكون “كيان”.. وفي حالة إن الكيان ده كان شركة كاملة، إيه أبعد مدى ممكن توصل له من الشر، خاصةً في دولة المفروض إنها بتحترم القانون وبتطبقه بصرامة.

مع نهاية الفيلم حسينا إن المشاكل البيئية تأثيرها ممكن يكون أكبر من شوية الكلام المحفوظ عن “ثقب الأوزون” وخلافه، ونعتقد إن هو ده الهدف الأساسي اللي كان عايز يوصله لينا المخرج “تود هاينز” والمؤلف “ماثيو مايكل كارنهان”.