في الويك إند.. 4 أفلام يستحقوا المشاهدة في سينمات القاهرة
أحلى الأفلام أفلام تستحق المشاهدة في السينما أفلام في السينما أفلام مصرية سينمات القاهرة فيلم سبايدر مان الجديد
Cairo 360
زمان قوي – وللأسف التسعينات أصبحت بيتقال عليها زمان قوي- كان الموسم السينمائي المصري شغال طوال الشتاء، بينما الإنتاج بيقل أو بيتوقف تمامًا في الصيف. وكان المنتجين والجمهور عارفين القاعدة دي كويس. لحد سنة ١٩٩٧ . لما تجرأ مجموعة شباب وعملوا فيلم غير طريقة عرض الأفلام العربية في سينمات مصر للأبد. الفيلم إسمه اسماعيلية رايح جاي، والشباب كانوا محمد هنيدي ومحمد فؤاد وخالد النبوي وحنان ترك! ومع النجاح الأسطوري للفيلم اللي تم عرضه في الصيف، أصبح الصيف هو موسم الأفلام العربية. بينما الشتاء بيمر بحالة خمول نسبي.
علشان كده حبينا في موسم الشتاء اللي الأفلام بتكون فيه (عزيزة) شوية. نرشح لكم 4 أفلام في سينمات القاهرة يستحقوا المشاهدة، منهم 3 أفلام مصرية، وفيلم أمريكي. جاهزين؟!
ريتسا
من بين كل التيمات اللي ممكن نزهق منها. التيمة الرومانسية اللي بتجمع أكتر من قصة حب في عمل واحد هتفضل من الحاجات اللي مش بنزهق منها أبدًا.
ريتسا بيحكي عن مجموعة من قصص الحب، اللي بتتحرك في الزمان والمكان، وبيجمعهم كلهم أنهم بيدوروا في الإسكندرية الجميلة، اللي حسينا من إعلان الفيلم أنها متصورة بشكل جديد وجميل ومختلف تمامًا.
حسينا أن الفيلم بينتمي إخراجيًا لعوالم داوود عبد السيد الساحرة. وطبعًا متوقعين مباراة تمثيلية من محمود حميدة وأحمد الفيشاوي، ومترقبين الوجوه الجديدة نسبيًا كارولين عزمي و مريم الخشت وأمير المصري هيعملوا ايه.
الكمين
من الإسكندرية الى اليمن! وتحديدًا سنة ٢٠١٨. لما بنشوف مجموعة من الجنود الإماراتيين بيقعوا في كمين أثناء واحدة من العمليات العسكرية.
من إعلان الفيلم، واضح جدًا أننا بنحكي عن فيلم عالمي. مش بس من حيث تكنيكات التصوير والخدع والإنتاج السخي، لكن كمان من حيث الكوادر المشاركة في صناعة الفيلم. ويكفي أنه من إخراج بيير موريل مخرج فيلم Taken. كل دي حاجات بتخلينا نرشح لكم (الكمين) للمشاهدة.
بره المنهج
الفيلم اللي عامل ضجة كبيرة بين محبي د. أحمد خالد توفيق، واللي كانوا بيتناقشوا في الفترة الأخيرة بين التشابهات بين (بره المنهج) وبين ثلاثية روايات كتبها الدكتور أحمد. لكن في رأينا ومن خلال إعلان الفيلم أن مافيش تشابه كبير. لكن الناس ربطت بين العملين لأن عمرو سلامة هو مخرج مسلسل ما وراء الطبيعة اللي كتبها الدكتور أحمد خالد توفيق.
بره المنهج بيحكي عن رحلة مختلفة بيخوضها الطفل اليتيم (نور) لما بيتعرف على ماجد الكدواني، راجل كبير في السن عايش في عزلة شبه تامة ومعظم الناس بتخاف منه.
يكفي أننا نشوف إسم ماجد الكدواني علشان نرشح الفيلم للمشاهدة، وكمان بيشاركه البطولة أحمد أمين ودينا ماهر وشريف دسوقي وأسماء أبو اليزيد وروبي.
Spider-Man : No Way Home
محبي أفلام مارفل عندهم (طلعه) لا غنى عنها طبعًا مع فيلم Spider-Man : No Way Home اللي محبي أفلام السوبر هيروز ظابطين تليفوناتهم على مواعيد العرض من زمن فات. الفيلم يستحق المشاهدة في السينمات، خصوصًا السينمات المؤهلة لعرض النوع ده من الأفلام، هتلاقوا قائمة بسينمات جامدة هنا.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
