كوميدي وأكشن وتراجيدي.. 6 أفلام تتفرج عليهم لو قاعد لوحدك في البيت
أفضل الأفلام أفلام أكشن أفلام أمريكية أفلام دراما أفلام سيرة ذاتية أفلام كوميدي سينما
Cairo 360
مع أجازات المدارس والجامعات الفترة دي، فيه ناس كتير، خصوصًا لو مغتربين في القاهرة، قاعدين حاليًا لوحدهم، وعلشان الناس دول هنتكلم عن 6 أفلام حلوة، محتاجين تركيز في المشاهدة، وعلشان كدة يفضل تتفرج عليهم مع نفسك.. بعيد عن الدوشة.
لو أنت من عشاق الأكشن والإثارة، يبقى ماينفعش يفوتك:
John Wick
الفيلم بيدور عن القاتل المحترف جون ويك (كيانو ريفز)، اللي عايش بعيد عن عالم الجريمة. لكن بيضطر يرجع لها تاني، بعد ما قام ابن رئيس عصابة كبيرة بسرقة السيارة بتاعته، وكمان قتل كلب صغير كان هدية من مراته قبل ما تموت. جرعة أكشن مكثفة، هتعيشك في أجواء مختلفة تمامًا. وتقدر تتفرج على الجزء التاني منه كمان.
أما لو بتحب الكوميديا والضحك، يبقى لازم تشوف:
Ride Along
“كيفين هارت” واحد من النجوم اللي تقدر تخليك تضحك مهما كنت متضايق. في الفيلم ده بيحب واحدة أخوها ظابط بوليس، وعايز يتجوزها. وعشان أخوها يوافق عليه، لازم يثبت شجاعته من خلال عمله كظابط بوليس لمدة يوم كامل. الفيلم له كمان جزء تاني.
أفلام السيرة الذاتية، والمأخوذة عن قصة حقيقة، لها طابع خاص. وفي النوع ده بنرشح لك:
Lion
النجم “ديف باتل” أبدع في دور (سارو). طفل هندي عنده 5 سنين بيتوه من أسرته. بتمر الأيام وبتتبناه عائلة استرالية. وبعد 25 سنة، بيقر يدور على عائلته الأصلية في الهند. الفيلم اترشح لـ 6 جوائز أوسكار.
عايز بقى حاجة تراجيدي، وبتتكلم عن قصة نجاح مع طابع رومانسي خفيف، يبقى هتلاقي ده في:
The Hundred-Foot Journey
من بطولة “مانيش دايال” و”هيلين ميرين”، بتدور أحداث الفيلم عن عائلة هندية بتروح قرية في فرنسا، وتفتح مطعم قدام أشهر مطعم في القرية دي. وبتحصل بعدها مجموعة من الأحداث الطريفة، بين العائلة وصاحبة المطعم.
أفلام الموسيقى والاستعراض بتشد أي حد، حتى اللي مش غاوي أفلام موسيقية. وده اللي قدر يحققه فيلم:
La La Land
عازف الجاز الطموح “رايان جوزلينج”، بيقع في حب “إيما ستون” اللي بتعشق التمثيل. وبتدور الأحداث عن محاولة كل واحد تحقيق حلمه. مع شوية استعراضات غنائية، مختلفة ومتنوعة خلال الأحداث، وفاز بـ 6 جوائز أوسكار.
أجواء المغامرة مع الخيال، بتاخدك لعالم تاني مختلف. ده هتلاقيه في:
Miss Peregrine’s Home for Peculiar Children
الفيلم من بطولة النجمة “إيفا جرين”، وإخراج “تيم برتون”. بتدور أحداثه عن بيت السيدة “بيريجرين”، اللي بيعيش فيه كل الأطفال اللي عندهم قدرات خارقة. وبيستعدوا للوقت اللي هيواجهوا فيه خطر كبير.
مشاهدة سعيدة!
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
