The Definitive Guide to Living in the Capital , Cairo , Egypt

الزمان: شهر ديسمبر.. قبل أيام من بداية السنة الجديدة 2023. المكان: المقر السري لموقع كايرو 360. حيث فريق العمل بيشتغل  علشان يقدم لكم مُحتوى مفيد وممتع وحديث. وده بيخلينا في سباق مع… الزمن.

 

بمناسبة الكلام عن الزمن.. نقدر نقول إن الزمن هو التحدي الأكبر اللي قابله البشر منذ بدء الخليقة. علشان يفهموه ويطوعوه لصالحهم. لأن البشر كانوا شايفين الزمن زي قطار بيسير في اتجاه واحد فقط، في رحلة ذهاب بدون عودة، لحد سنة 1916.

 

ومنين بييجي الشجن .. من اختلاف الزمن

ومنين بييجي الهوى .. من ائتلاف الهوى

 

في السنة دي بدأ العالم الشهير ألبرت آينشتاين، ينشر أبحاثه عن الوقت والزمن، وقدر يثبت، أن الزمن مش بس بيمشي في اتجاه واحد، وأننا لو تحركنا بالسرعة الكافية، هنقدر نتحرك في الزمن. وده مُختصر بسيط عن نظرية النسبية اللي اكتشفها آينشتاين. وحفزت آلاف العلماء أنهم يشتغلوا على الفرضية دي.

بس العلماء مش الوحيدين اللي اتغيرت فكرتهم عن الزمن. الفنانين والمبدعين هم كمان عبروا عن اختلاف نظرتهم للزمن في أعمالهم. وفي لوحته الشهيرة إصرار الذاكرة – أو ثبات الذاكرة- بيورينا الرسام العالمي سلفادور دالي نظرته لنسبية الزمن من خلال رسم ساعات هشة ولينة، في تعبير واضح أن الزمن هو كمان أصبح قابل للتغير.

صُناع الأفلام اشتغلوا على فكرة نسبية الزمن، وقدموا لنا أعمال رائعة لعبت على الفكرة دي. بأكتر من تيمة.

 

The Curious Case of Benjamin Button

 

سنة 2008 استقبلت السينمات فيلم مُدهش بعنوان The Curious Case of Benjamin Button ومن بطولة براد بيت وكيت بلانشيت، عن قصة حقيقية لمريض بمرض نادر جدًا، بتخلي الزمن بالنسبة له معكوس. بمعنى أنه بيتولد بملامح عجوزة، ثم يبدأ يمر بمرحلة الشباب ثم الطفولة!

الفيلم كان مدهش بجد من حيث تطويع المكياج والمؤثرات في إنتاجه. مش بس بمعايير 2008 لكن لحد دلوقت. ومش هتقدروا تحبسوا دموعكم مع اقتراب الفيلم من النهاية.

 

ليه يا زمان ما سبتناش أبرياء

وواخدنا ليه في طريق ما منوش رجوع

 

Inception

بعد 2008 بسنتين، كريستوفر نولان كان بيعمل عظمة! كان بيقدم فيلمه Inception للسينمات. الفيلم بيناقش فكرة فانتازية، عن قدرة بعض الأشخاص أنهم يتدخلوا في أحلام الأخرين، ويزرعوا فكرة معينة في أدمغتهم. الفيلم استفاض في شرح نظريات لها علاقة بتغير الزمن بتغير الواقع. بمعنى أن حلم لمدة 3 دقائق ممكن تحصل فيه أحداث تستغرق 3 سنوات! ودي حاجة حقيقية إحنا بنشوفها في أحلامنا. خاصة لو متقلين شوية في الأكل 😅.

Interstellar

لسه مكملين مع كريستوفر نولان، اللي الزمن عامل له هاجس حقيقي، بيظهر في كل أعماله. وأهمها Interstellar اللي بيستعرض رحلة رائد فضاء خارج الأرض، وإزاي الزمن مر عليه بشكل مختلف عن مروره على الأرض. الماستر سين المرعب في الفيلم، كان لما بطلنا رجع الأرض وشاف بنته وهي بتحتضر، بينما هو لسه شاب صغير في السن، لأن الزمن مر عليه بشكل مختلف عن مروره على الأرض!

 

دور يا زمن

وخدنا في دايرتك

وان عاكستك خطاوينا أو سايرتك

هتدور بينا يا زمن.. هتدور ينا

وتجيب اخرنا ولا بنجيب اخرتك

 

الرقص مع الشيطان

قبل كل الأفلام دي، وتحديدا سنة 1993 نور الشريف كان بيستعد لرقصة خاصة جدًا.. رقصة مع الشيطان. في واحد من أفلام الخيال العلمي القليلة في السينما العربية. عن دكتور بيرجع من الاتحاد السوفيتي، بيكتشف نبات غريب، بيقدر يخليه يسافر عبر الزمن، سواء في المستقبل أو الماضي.

الميزة في الرقص مع الشيطان، أنه ناقش بتوسع وجهة النظر الفلسفية للسفر عبر الزمن، وقدم نظريات فلسفية ودينية وعلمية عميقة جدًا للمشاهد العادي في إطار من الدراما المخلوطة بالأكشن والرعب. وفي رأينا أن الرقص مع الشيطان ما أخدش حظه من الشهرة والنجاح. زي معظم تجارب أفلام الخيال العلمي العربية.

 

وينفلت من بين إيدينا الزمان

كأنه سَحبة قوس فى أوتار كمان

وتنفرط الايام.. عقود كهرمان

يتفرفط النور.. والحنان.. والأمان

 

The Terminator

ولأن صناع السينما عارفين أننا بنتفرج بغرض المتعة أولًا وأخيرًا، قدموا من خلال سلسلة The Terminator الشهيرة، فيلم أكشن عالمي بطولة أرنولد شوارزنيجر، عن آلة قتل بتعود للماضي علشان تتخلص من طفل.. لأنه هايكون زعيم المقاومة اللي هيغير العالم في المستقبل. ومحاولة المتمردين أنهم يفشلوا المخطط ده من خلال إرسال انسان آلي لنفس الفترة الزمنية لحماية الزعيم.

من بداية الخلق، ولحد نهاية العالم. الزمن هيظل محور تفكير واهتمام المبدعين والفنانين والشعراء. جنبًا الى جنب مع العلماء والفيزيائيين ورجال الدين والفلسفة.

أو زي ما قال عمنا العبقري سيد حجاب اللي بنختم بأشعاره زي ما استعرضناها معاكم في رحلتنا:

يا تري اللي بيعيش الزمن … إحنا

ولاّ الزمن هو اللي بيعيشنا ؟!!