The Definitive Guide to Living in the Capital , Cairo , Egypt

النهاردة في القاهرة فيه حدث مهم جدًا لمحبي صناعة السينما والأفلام، وحتى اللي بيحبوا يتفرجوا على أفلام جديدة ومختلفة، النهاردة هنكون في ضيافة “دِكّة أضِف” اللي بتقدم دعوة لكل جمهورها، وكافة المهتمين وصُناع الأفلام للاستمتاع بعروض “أيام سيما دِكّة للفيلم القصير” اللي هيبتدي النهارده وهيستمر كل ثلاثاء لحد يوم 27 أغسطس من كل سنة، وبمشاركة مجموعة متميزة من صناع الأفلام والعاملين في مجال السينما.

كل عرض هيكون في بعده جلسة عن أحد جوانب صناعة الأفلام بصحبة ضيف عامل بمجال فن وصناعة السينما، وهيكون في حلقات نقاشية مختلفة بين الجمهور وصناع الأفلام المعروضة والضيوف.

ومن المشاركين في الدورة الحالية المخرجين “أحمد عبد الله السيد” و”مصطفى يوسف” و”هالة جلال” والمنتجة “دينا حرب”، والسيناريست “محمد فريد” ومدير التصوير “ماجد نادر” والموزع “مروان الشافعي”.

“سيما دِكّة للفيلم القصير” برنامج غير تنافسي، بمعنى إنه مش مسابقة، وهو مخصص لصناع الأفلام القصيرة من الشباب العرب بشكل عام، وهدفه هوه دعم صُناع الأفلام من خلال إتاحة الفرصة لعرض الأفلام اللي أنجزوها، وبعدين المناقشة فيها مع مجموعة من السينمائيين من أصحاب الخبرة.

البرنامج بيوفر لجميع المخرجين وصناع السينما المتقدمين دعم في إيجار واستخدام إمكانيات مؤسسة “أضف”، وهي عبارة عن معدات تصوير، وساعات مونتاج، واستوديو صوت، ومساحة للتصوير، لإنجاز أفلامهم.

في فعاليتان على مدار السنة بيقدمهم البرنامج؛ الفعالية الأولى عبارة عن جلسات نقاشية خلال شهر يوليو وأغسطس، والثانية عبارة عن فاعلية البانوراما في فبراير 2020، وهي عبارة عن عروض متتابعة للسينما العربية والأفلام اللي مالحقتش موسم العرض في 2019.

برنامج الافتتاح النهارده هيتضمن 6 أفلام قصيرة من مصر، هتبدأ العروض من الساعة 7 بالليل، والدعوة عامة والدخول مجانًا، وهيكون ضيف اليوم المخرج “أحمد عبدالله السيد” 

تفاصيل البرنامج ومواعيد العروض والأفلام المعروضة يوم بيوم هتلاقوها على صفحة دكة أضف على الفيس بوك من هنا.