The Definitive Guide to Living in the Capital , Cairo , Egypt

زي ما ليل القاهرة مليان حفلات كلها مزيكا وغنا. كمان موجود فيه أفلام متنوعة ومختلفة، بتعرضها مساحات ومراكز ثقافية كتيرة. وإحنا كالعادة في كايرو 360، قومنا بمهمة حصر الأفلام دي، علشان نعرفكم على أماكن ومواعيد عرضها.

فيلم Neruda في بلكون هليوبوليس – 25 أغسطس

فيلم Neruda بيدور عن محقق بيطارد الشاعر التشيلي “بابلو نيرودا”، الحاصل على جائزة نوبل. وده بعد ما بينضم للحزب الشيوعي، ويصبح هارب من العدالة في أواخر الأربعينيات. العرض هيكون الساعة 8 مساءً. وسعر التذكرة: 25 جنيه. الفيلم أرجنتيني.

 

فيلم Camera Buff في مجنوليا – 26 أغسطس

في Camera Buff ريتشارد بيشتري كاميرا 8 مم، خلال ولادة طفله الأول. وبما إنها الكاميرا الوحيدة في البلد، ريتشارد بيكون هو المصور الرسمي فيها. وفيما بعد بيهتم بصناعة الأفلام. العرض هيكون الساعة 7 مساءً. والدخول مجانًا. الفيلم بولندي.

 

فيلم Gifted في مركز جسور – 26 أغسطس

مركز جسور الثقافي هيعرض فيلم Gifted. اللي بيدور عن راجل أعزب، عايشة معاه بنت أخته “ماري”. البنت عندها قدرات عقلية أكبر من سنها. الأمر اللي بيعرض حياة البنت للمشاكل من جانب جدتها. العرض هيكون الساعة 6 مساءً. الدخول مجانًا. الفيلم أمريكي.

 

فيلم Night on Earth في رووم – 27 أغسطس

 في رووم آرت سبيس، هيكون ميعادكم مع فيلم Night on Earth. الفيلم بيقدم 5 قصص مختلفة، لخمس سائقين تاكسي، في 5 مدن مختلفة. وهم: نيويورك – باريس – روما – لوس أنجيليس – هلنسكي. العرض هيكون الساعة 8:30 مساءً. وسعر التذكرة: 35 جنيه. الفيلم ألماني.

 

فيلم Graduation في مجنوليا – 28 أغسطس

فيلم Graduation بيدور عن طبيب بيخطط لدراسة بنته في الخارج. ولما بتيجي لها فرصة مناسبة، بتتعرض لاعتداء. ويبقى شاغل باله حل مشكلة بنته. العرض هيكون الساعة 7 مساءً. والدخول مجانًا. الفيلم روماني.

 

فيلم Lion في بلكون هليوبوليس – 28 أغسطس

ننصحكم ماتفوتوش الفيلم ده تحديدًا علشان هيعجبكم جدًا. Lion بيدور عن طفل هندي بيتوه من عائلته وهو صغير. وبتتبناه عائلة استرالية. وبعد 25 سنة، بيبدأ رحلة البحث عن أهله الحقيقيين. الفيلم اترشح لـ 6 جوائز أوسكار. وفاز بجوائز تانية كتيرة. العرض هيكون الساعة 8 مساءً. وسعر التذكرة: 25 جنيه. الفيلم أمريكي.

 

أفلام زاوية من 23 – 29 أغسطس

سينما زاوية في وسط البلد، بتعرض فيلمين جداد الاسبوع ده لحد يوم 29 أغسطس:

فيلم Perfect Strangers

وده بيدور عن 7 أصدقاء بيتجمعوا على العشاء. ولما يقرروا يعرضوا على بعض المكالمات والرسائل والإيميلات بتاعت كل واحد، بتظهر مفاجآت بينهم لأول مرة. الفيلم إيطالي.

فيلم Hedi

بيدور عن “هادي” شاب تونسي عايش حياة روتينية. وبيتحكم في حياته كل اللي حواليه، زي أهله أو مديره في الشغل. الفيلم تونسي.

مواعيد العرض من 12 ظهرًا لـ 10 مساءً. وسعر التذكرة: 25 – 35 جنيه.

يلا استعدوا لجرعة جامدة جدًا من الأفلام.