The Definitive Guide to Living in the Capital , Cairo , Egypt

“يوجد ألف سبب يدعوني لكراهية الربيع.. آخرها أنه ينذر بمرض شاعري الاسم لا نجده في فصل آخر: الرمد الربيعي. لهذا أحب الخريف.. ولو تغاضينا عن حقيقة أنه لا يوجد رمد خريفي؛ يمكننا القول بأنه الفصل الوحيد الذي له مذاق الحزن المرهف.. والرقة الشفافة.. ذلك المذاق الذي لا نجده في فصل آخر”.

كلمات بسيطة لكن عميقة، وصف بيها الكاتب أحمد خالد توفيق فصل الخريف.. الفصل اللي بيجمع بين رومانسية وهدوء الشتاء، مع بعض الصخب من الصيف، وبالتأكيد، كتير من التقلبات الجوية والكهرباء الاستاتيكية اللي بتلمس أرواحنا قبل أجسادنا.

ولأن الأفلام هي أفضل صديق في الأجواء دي. تعالوا نشوف مع بعض مجموعة من أحلى الأفلام اللي ممكن تتفرجوا عليها في الخريف:

 

You’ve Got Mail

بنعتبر You’ve Got Mail صديق العشاق الأول، مش بس علشان الأجواء الخريفية اللي بيدور فيها، لكن كمان علشان القصة بتحكي عن حالة حب بيعيشها اتنين متخانقين على أرض الواقع، لكن على الإنترنت بيجمعهم الشات وتبادل الإيميلات. لحد ما بيقرروا يتقابلوا في الحقيقة وتحصل المفاجأة.

مش محتاجين نتكلم عن التمثيل العبقري من توم هانكس، والجميلة ميج ريان، اللي كنا بنتخيلها كل مرة ندخل فيها أونلاين نعمل شات مع حد ما نعرفوش.

Autumn

الخريف مش دايمًا بيعبر عن الرمانسية والخيال.. ممكن كمان يكون مرادف للرعب. فيلم  Autumn اللي تم إنتاجه سنة 2009 بيحكي عن فيروس غريب بيقتل ملايين البشر في ثواني. وبيكون أمام الناجين تحدي أنهم يجمعوا شتات نفسهم ويعيدوا توحيد صفوفهم، خاصة أن الأمور بتتجه أنها تكون أسوأ بكتير.

 

Sweet November

نرجع تاني للرومانسية. فيلم Sweet November عن راجل مدمن لشغله، بتضطره الأحداث أنه يقيم مع واحدة على النقيض من أفكاره وأفعاله تمامًا، وده طوال شهر نوفمبر. الإقامة اللي هتغير حياتهم تمامًا.

فيلم Sweet November لطيف جدًا وبنشوف فيه تعاون بين اتنين من أباطرة هوليوود. كيانو ريفز وتشارلز ثيرون. في أدوار بعيدة عن أدوار الأكشن والصراعات اللي قدموها قبل أو بعد Sweet November.

 

Election

مع احترامي، للناس وللأسامي، بس فصل الخريف مش بس للرومانسية أو الرعب. إحنا ليه ناسيين أن فصل الخريف يشتهر ببداية الدراسة؟! ولكل طالب عاوز يتفرج على فيلم له علاقة بعالم المدارس والجامعات. نهديه فيلم Election المنتج سنة 1999 بطولة ماثيو بروديريك وريس ويذرسبون، واللي بنشوف فيه العالم الخفي للانتخابات الدراسية، وإيه اللي ممكن يحصل فيه في إطار كوميدي قادر يخطفنا من أول مشهد لأخر مشهد.

 

Parasite

ولأن الحلو دايمًا بنخليه للأخر.. فيلم  Parasite مش بس فيلم خريفي جميل. ده الفيلم الفائز بأوسكار أحسن فيلم سنة 2020 كأفضل فيلم أجنبي. يعني هنشوف مباراة تمثيلية غير تقليدية. لكن الأحسن من التمثيل هنا، هو القصة نفسها. اللي بتحكي عن أسرة تحت خط الفقر، بتقدر – بطريقة معينة مش عاوزين نحرقها عليكم- أنهم يحلوا محل أسرة غنية جدًا. ومن هنا بتبدأ الأحداث في التصاعد.