The Definitive Guide to Living in the Capital , Cairo , Egypt

الحياة في كايرو

أبسط 10 أعمال خير ممكن تعملها تبسط بها اللي حواليك في رمضان

أبسط 10 أعمال خير ممكن تعملها تبسط بها اللي حواليك في رمضان
بواسطة
Dina Mokhtar

من غير ما ندخل في جو كليشيهيات من نوعية "رمضان شهر الخير" والكلام اللي بـ نخزنه في الذاكرة من السنة للسنة… هـ نكتفي أننا نخلي افتتاحية المقال بـ كل سنة وأنتم طيبين. من الحاجات اللي رمضان مشهور بها عندنا في مصر -غير العزومات والمسلسلات- هي إعلانات المؤسسات والجمعيات الخيرية المختلفة، واللي أغلبيتنا بـ يعمل لها Mute  -وأحيانًا بـ نغير القناة أصلًا- أول ما بـ تظهر على الشاشة، مش علشان إحنا "وحشين" لا سمح الله، بس يمكن من تكرارها الواحد تعاطفه بـ يقل، أو حتى لأن الواحد كل سنة بـ يبقى في نيّته أنه يتبرع في الجمعية الفلانية أو أنه يروح المستشفى دي بس الوقت بـ يجري منه والمخطط بـ يبوظ… وأحيانًا ثانية المسألة بـ يبقى داخل فيها اعتبارات مادية وزمنية، وهكذا.

المهم… المقال ده لا هـ يقول لك "تعاطفك لوحده مش كفاية"، ولا "تعالوا زورونا… باي باي"، إحنا حاولنا نبسط لك 10 اقتراحات في إزاي تساعد وتسعد اللي حواليك بخطوات بسيطة فى رمضان:

1- كمية المصاريف اللي الواحد بـ يدفعها من جيبه كل يوم بـ يروح فيه الشغل رهيبة؛ من أول القهوة والشاي، الديليفري والسجائر وحتى وقفة الكشك اللي بـ تلاقي فيها نفسك دافع مش أقل من 10 جنيه. لو خرجت من مصاريف اليوم الواحد 10% بس منها وجمعتهم أسبوعيًا وسلمتهم لشخص أنت عارف أنه محتاج، هـ تساعد غيرك من غير ما تحس.

2- لو مالكش في القهوة ولا السجائر، وأكلك بـ تيجي به الشغل من البيت، تقدر تخرج كل يوم 2 جنيه لأي حد، أو تقدر تجمعهم وتزود عليهم في آخر الأسبوع جنيه زيادة يبقوا 15 جنيه تسد مع أي شخص محتاج.

3- مالكش في التحويش أصلًا، ومش عاجبينك الفكرتين دول، خذ دي: واحد زي بائع الجرائد، صبي المكوجي وأي طيار ديليفري أو واحد واقف في بنزينة… دول ناس بـ يعتمدوا على الإكراميات أكثر ما بـ يعتمدوا على مرتباتهم، تقدر تزوّد على حساب الخدمة اللي بـ يقدموها لك جنيه أو اثنين.

4- بـ تجيب الطلبات بنفسك من السوبر ماركت، بـ تكوي ملابسك بنفسك وما عندكش عربية أصلًا… تمام، ممكن تفتكر أي حد غلبان معاك بأي حاجة من السوبر ماركت (كيس عيش وعلبة جبنة وزجاجة مياه مثلًا)، وسلمهم له بكيسهم زي ما هم… ما تنساش تشيل السعر من عليهم.

5- العزومات شيء بديهي في رمضان؛ وكم الأكل اللي بـ نعمله في العزومة الواحدة ممكن يكون ضعف الأكل اللي بـ نأكله في أسبوع واحد في الأيام العادية. لو عندك Dish Party  وهـ تحضر أكل تروح به، أعمل كمية صغيرة من اللي أنت هـ تطبخه ووزعه على أي محتاج.

6- لو مش هـ تعمل أكل، وهـ تجيب الحلو، ممكن تجيب 8/1 بسبوسة سادة (من الآخر أقل كمية من أرخص حاجة تلاقيها) وتسلمها لأي شخص أنت عارف أنه ما عندوش رفاهية أنه يحلي بعد الإفطار.

7- لو هـ تفطر بره البيت، ما تنساش تأخذ الأكل اللي ما قدرتش تكمله معاك تيك أواي، لأنه هـ يبقى سحور شخص تانى.

8- لو عندك خط شهري للمحمول وبـ يجمع نقاط، فيه شركات بـ تتيح أنك تتبرع بثمن النقاط دي لمجموعة من الجمعيات الخيرية، كل اللي هـ تعمله أنك ممكن تكلم شركتك تسألها عن إزاي تنفذ الموضوع ده.

9- لو أنت كارت، أو شركتك مش بـ تقدم الخدمة دي، ممكن تقف في أي كشك عنده علامة فوري، وتدفع أي مبلغ تقدر عليه لصالح أماكن زي بنك الطعام ومستشفى 57357.

10- لما العيد يبدأ يقرب، طلع من الدولاب الملابس اللي حالتها كويسة بس مش بـ تلبسها، اغسلها -وإن أمكن أكويها– وأكيد هـ تلاقي شخص يفرح بها.

 

جرب كده وهـ تكتشف أن الخطوات دي هـ تسعدك قبل ما تسعد بها اللي حواليك.

مقترح