The Definitive Guide to Living in the Capital , Cairo , Egypt

كل يوم في بلادنا بيعدي علينا أنشطة ومبادرات وأفكار كتيرة، منها اللي بقاله سنين، ومنها اللي لسه بيبتدي، ومنها اللي لسه فكرة في دماغ صاحبها، ومنها المفيد واللي ضاف، ومنها اللي ماحسيناش بيها، لكن في الآخر كل المبادرات والأنشطة دي بتقولنا حاجة واحدة، إننا بنفكر وبنحب بلادنا، وفينا الخير.

النهارده بنوتة مصرية اسمها “سارة خيري” درست هندسة قسم عمارة، ومن دراستها اكتشفت أسرار وجمال البيوت المصرية من أول بابها لحد حيطانها، وبحكم شغلها لفت وشافت أنواع وأشكال مختلفة من أشكال المباني المعمارية، وده ألهمها إنها تعمل مبادرة جديدة  سمتها ” أبواب القاهرة – doors of Cairo” .

القصة بدأت مع “سارة” وهي في واحدة من جولاتها، ولقت نفسها بتسأل سؤال حلو أوي هو “ليه الناس اللي مش متخصصين في الفنون أو العمارة أو حتى الدارسين مايتعرفوش على تاريخ المعمار المصري وأنواعه وجماله بشكل بسيط وظريف؟” فقررت تنفذ ده عن طريق مبادرتها اللي هدفها جذب الكل – مش بس المتخصصين- للمعمار المصري.

المبادرة هدفها ظريف وجديد ومبهج في الوقت نفسه، وهو توثيق 1000 شكل من أشكال أبواب البيوت في القاهرة، وفعلًا قدرت تعمل ده، وقالت في تعليق ليها على سؤال “إشمعنى الأبواب” في لقاء ليها في برنامج “صباح الورد” على قناة “ten” إن كل مبنى أثري هو مهم ومشوق، إلا إن تركيزها على الأبواب سببه عدم تركيز المصورين عليها، وكانت البداية تصويرها لأبواب الكنيسة المعلقة، وهي الطريقة اللي بتعتمدها في مبادرتها، إنها تاخد صورة للأبواب وتكتب قصة كل باب وتفاصيله، والأجمل بقى إن المبادرة لقت إقبال وإعجاب واهتمام كبير.

مبادرة “سارة” ضمت مجموعة ضخمة من صور الأبواب، منها مثلًا أبواب المتحف القبطي، اللي فيه تفاصيل ونحوتات كتيرة.

ممكن تزوروا صفحة المبادرة على الـ “فيسبوك” علشان تتفرجوا على صور وتتعرفوا عليها أكتر من هنا.

أو تتابعوها على “إنستجرام” من خلال حساب المبادرة الرسمي من هنا.