The Definitive Guide to Living in the Capital , Cairo , Egypt

جهاز حماية المستهلك، أعلن رسميًا عن إحالة المركز الألمانى لإبادة الحشرات والقوارض للنيابة، لأ مش علشان كمية الرسايل اللي بيبعتها للمصريين، لكن علشان هو مش حاصل على تصريح من وزارة الصحة.

وقال عاطف يعقوب رئيس جهاز حماية المستهلك، فى بيان صحفى إنه بمباشرة التحقيق فى الشكاوى، ظهر أن المركز الألمانى لإبادة الحشرات والقوارض مش حاصل على ترخيص من وزارة الصحة لممارسة نشاط رش الحشرات، وبالتالى ما عندهوش تصريح باستعمال المواد المستخدمة فى الرش، وإن المكونات اللي بيستخدمها مش معروف مكوناتها، وده ممكن يسبب آثار جانبية على صحة المواطنين.

والجهاز بيحذر جمهور المستهلكين من التعامل مع المركز ده.

وجهاز حماية المستهلك بينسق حاليًا مع وزارة الزراعة لمراجعة ضوابط ممارسة المراكز دي لأنشطتها والمواد المستخدمة فيها لاستبعاد الضار منها.

وحذر جهاز حماية المستهلك، جميع المستهلكين من التعامل مع شركات إبادة الحشرات اللي مش حاصلة على تصريح من وزارة الصحة، وده بسبب استخدامها مواد مجهولة المصدر فى عمليات الرش، وعلشان كدة هي خطر على الصحة العامة.