The Definitive Guide to Living in the Capital , Cairo , Egypt

بمناسبة اليوم العالمي للغتنا العربية اللي بييجي يوم “18 ديسمبر” من كل سنة ميلادية، انطلقت السنادي مبادرة اسمها “أسبوع اللغة العربية”، وهدفها أنها تحول الحدث الدولي ده لنقطة تجمع لكل المهتمين باللغة العربية، على أمل أن اتحاد الطاقات اللي شغالة في السكة دي ينتج عنها تغيير حقيقي على الأرض.

يوم 18 ديسمبر بالذات تم اعتماده كمناسبة رسمية للاحتفال باللغة العربية لأنه ده اليوم اللي قررت فيه الجمعية العامة للأمم المتحدة أنها تدخل اللغة العربية ضمن اللغات الرسمية اللي بيتم العمل بيها في الأمم المتحدة، وده كان في سنة 1973 تحديدًا، بعد زمن طويل كانت اللغة العربية فيه خارج قائمة اللغات اللي بيتم التفاعل بيها رسميًا في المنظمة.

مبادرة “أسبوع اللغة العربية هتمتد من السبت 16 ديسمبر لحد نهاية الأسبوع يوم الجمعة 22 ديسمبر، وهتتنوع أنشطتها في أكتر من اتجاه، بعضها هيكون بيستهدف عموم الجمهور، والبعض الآخر هيكون بيستهدف فئات محددة من المهتمين باللغة أو النشطين في مجالات بتتعلق بيها.

الفعالية الرئيسية

الفعالية الرئيسية للمبادرة هتكون عبارة عن حدث (أو Event) مجمع، هيستضيفه بيت السحيمي في السيدة زينب يوم الاثنين 18 ديسمبر اللي بيوافق اليوم العالمي للغة العربية زي ما قلنا قبل كده، وهيحضر الحدث ممثلين عن كل الجهات المشاركة في إطلاق المبادرة أو دعمها، الجهات اللي بتتنوع بين مؤسسات حكومية زي “صندوق التنمية الثقافية” و”مكتبة مصر العامة”، ومؤسسات خاصة زي “ساقية الصاوي”، ومساحات عمل مشتركة زي “قفير” و”شفشاون”، ودور نشر زي “دون”، ومكتبات زي “ألف”، ومنصات إنتاج محتوى عربي زي “إضاءات”، ومبادرات تثقيف لغوي زي “اكتب صح”، ومراكز بحثية زي “نماء”، وغيرها.

فعاليات أخرى

وبجانب الفعالية الرئيسية للمبادرة هتكون في فعاليات تانية هتنظمها بعض الجهات المشاركة في المبادرة بشكل منفصل، زي فعالية مدرسة النزهة الدولية على مسرح الفلكي يوم 16 ديسمبر، وفعالية ساقية الصاوي يوم 18 ديسمبر احتفالًا باليوم العالمي للغة العربية، وفعالية مركز اللغة العربية بجامعة القاهرة يوم الأربعاء 20 ديسمبر واللي هتكون عبارة عن ندوة كبيرة هيحاضر فيها مجموعة من الأساتذة المتخصصين، وفعالية منصة “رواة” في مكتبة مصر العامة (فرع الجيزة) يوم الخميس 21 ديسمبر واللي هتكون عبارة عن أمسية شعرية وفقرات إلقاء، وزي فعالية مدرسة شيخ العمود للعلوم التراثية اللي هتقام في مقر المدرسة ببرج التطبيقين في العباسية.

حملة إلكترونية

وبالتوازي مع الفعاليات المقامة على الأرض هتنطلق حملة إلكترونية كبيرة على مواقع التواصل الاجتماعي للتوعية بأهمية اللغة العربية والتشجيع على استخدامها وإحياء التفاعل بيها، والنشاط الرئيسي للحملة الإلكترونية هيكون على صفحة “أسبوع اللغة العربية” على موقع “فيسبوك”.

عروض ومنح

كمان جنب الفعاليات اللي على الأرض والحملة الإلكترونية هيتم –برعاية المبادرة- تقديم عروض للجمهور من بعض الجهات المشاركة في دعم المبادرة، سواء بخصومات من دور النشر على مطبوعاتها خلال أسبوع الحملة، أو بامتيازات ومنح من مساحات العمل والمراكز الثقافية في استضافة وتنظيم بعض الفعاليات المتعلقة باللغة العربية، أو بجوائز مادية ومعنوية من الجهات الأخرى لمناسبات مختلفة.

في النهاية واجب نقول أنه اللغة العربية مش مجرد أداة تفاعل بنستخدمها في التعبير عن المعاني اللي بتدور في نفوسنا أو بتطرأ على أذهاننا، إنما هي جزء أساسي في تكويننا الإنساني، وزي  ما لون بشرتنا القمحي مثلًا بيميزنا بين الناس على مستوى الشكل؛ فاللغة العربية بتميزنا على مستوى التعبير عن المعارف والانفعالات، وبالتالي فالاهتمام بيها هو اهتمام بنفوسنا وذواتنا، ومن غيرها هنفضل مقطوعين عن ماضينا، وتايهين في حاضرنا!