The Definitive Guide to Living in the Capital , Cairo , Egypt

الصور: صفحة المتحف على فيسبوك

العد التنازلي بدأ لافتتاح المتحف المصري الكبير 2025، واحد من أهم المشاريع الثقافية في العالم، واللي بتستعد الحكومة المصرية تفتحه نهاية السنة دي في حفل عالمي يليق بعظمة الحضارة المصرية القديمة.

ومع اقتراب الافتتاح، زاد اهتمام الناس بالبحث عن أسعار تذاكر المتحف المصري الكبير، مواعيد الزيارة، وطريقة الحجز أونلاين، خصوصًا إن المتحف بيضم آثار نادرة وقطع فريدة من تاريخ مصر، أبرزها المجموعة الكاملة للملك توت عنخ آمون، ومراكب خوفو.

موعد افتتاح المتحف المصري الكبير

بحسب الخطة الرسمية، حفل الافتتاح العالمي هيكون يوم 1 نوفمبر 2025، وهيستمر على مدار 3 أيام متواصلة بحضور قادة وملوك ورؤساء من مختلف دول العالم. بعد كده، هيتم فتح أبواب المتحف للجمهور بداية من 4 نوفمبر 2025.

رئيس الوزراء وجه الوزارات المختلفة بسرعة إنهاء كل الترتيبات والتجهيزات، سواء داخل المتحف أو في المنطقة المحيطة، علشان يخرج الحفل بالصورة اللي تليق بمكانة مصر.

مايفوتكش كمان: الممشى السياحي الجديد.. من المتحف المصري الكبير لحد الأهرامات (صور)

أسعار تذاكر زيارة المتحف المصري الكبير 2025

الجهات الرسمية أعلنت قائمة أسعار التذاكر، واللي بتختلف حسب الفئة:

المصريين: 200 جنيه.

الطلاب والأطفال وكبار السن (المصريين): 100 جنيه.

العرب والأجانب: 25 دولارًا (حوالي 1200 جنيه).

الطلاب والأطفال (العرب والأجانب): 600 جنيه.

غير المصريين المقيمين في مصر: يتم محاسبتهم بنصف قيمة تذكرة الأجانب بشرط وجود إقامة سارية.

الأجانب المتزوجين من مصريين وأبنائهم والعكس: بيتم معاملتهم بنفس معاملة المصريين.

كمان فيه نظام خاص للزيارات خارج مواعيد العمل الرسمية (الفتح الخاص)، واللي بيكون برسوم 250 ألف جنيه لـ50 فرد، بالإضافة لرسوم الدخول لكل شخص حسب فئته، ويضاف 5 آلاف جنيه لكل فرد إضافي.

أما مع افتتاح قاعة توت عنخ آمون ومتحف مراكب خوفو للجمهور، هيتم تعديل سعر تذكرة غير المصريين في المواعيد الرسمية والزيارات المسائية لتكون 30 دولارًا للفرد.

رابط حجز تذاكر المتحف المصري الكبير 2025

الزوار يقدروا يحجزوا التذاكر بكل سهولة أونلاين عن طريق الموقع الرسمي للمتحف، واختيار التاريخ المناسب وبيانات الزيارة.

رابط الحجز المباشر: (اضغط هنا)

المتحف المصري الكبير مش مجرد مكان للعرض، لكنه مشروع عالمي هيغير خريطة السياحة في مصر والشرق الأوسط. استعدوا لافتتاح تاريخي هيكون حديث العالم كله.