The Definitive Guide to Living in the Capital , Cairo , Egypt

الفن المصري طول عمره فن حي، بمعنى أنه مواضيعه دايمًا تلاقيها من واقع الناس، بتوصفه وتعالجه وتشاور عالحلو فيه وتنتقد الوحش فيه أو تسخر منه، وهكذا.. وأحد أهم وأجمل مظاهر حياة الفن المصري أنك ما تلاقيش مناسبة من المناسبات أو حدث من الأحداث إلا والفن اهتم بيه واتكلم عنه وحكى مشاعرنا كمصريين تجاهه، ومن المناسبات دي: الأعياد.. الأعياد اللي كان ليها نصيب لا بأس به فيه إنتاجات أكبر نجوم الفن المصري على مر عصوره، بدايةً من عصر غنا المشايخ لحد عصرنا الحالي.. ومن وسط كل الأعمال اللي اتعملت في مجموعة أعمال كده مابقتش مجرد حاجة اتعملت علشان توصف المناسبة أو تحكي عن سعادتنا بيها، لأ دي اتحولت مع الوقت لجزء من المناسبة.. وبقينا ماينفعش نعيش أجواء فرحتها وبهجتها إلا واحنا بنسمع أو بنشوف الأعمال دي.. زي إيه مثلًا؟

أهلًا أهلًا بالعيد
على رأس القائمة طبعًا تيجي الأغنية الأشهر للفنانة صفاء أبو السعود، اللي كلنا صغيرين وكبار متعلقين بيها ومعلقين فرحتنا بالعيد على سماعها والفرجة عليها.

يا ليلة العيد
الست أم كلثوم ماسابتش صغيرة ولا كبيرة إلا وحطت عليها بصمتها.. صوتها الفخم مع عظمة اللحن والكلمات خلوا أغنية "يا ليلة العيد" أكتر من مجرد أغنية نسمعها علشان نعيش الجو.. دي ملحمة طرب مصري أصيل بيحكي كل حرف في كلماتها وكل نغمة في ألحانها ألف حكاية، ويستدعي من سميعة كل زمان ومكان الدعا بألف رحمة ونور على الست.

 

العيد عيدنا وحنعيّد
مانظنش أن الفنانة ياسمين عبدالعزيز ممكن تعتز بعمل من أعمالها أد الأغنية دي.. ده العيد ييجي ونلاقي لحنها يرن في وداننا من قبل ما نسمعها ولا مرة حتى!

 

العيد السنادي أحلى كل الأعياد
الأطفال أحباب الله، ولما تكون طفلة بموهبة وخفة دم غادة رجب ده يخلي جمال الروح ينضرب في ألف.. انشالله يارب يدوم كل عيد أحلى من كل اللي قبله علينا.

الليلة عيد
المقطع المميز من الأغنية الطويلة للفنانة ياسمين الخيام.. اللي فضل على مر السنين اللي فاتت هو الفاصل الأميز والأقوى بين البرامج والفقرات التليفزيونية اللي بتتعرض طول الوقت في أيام العيد.. الليلة عيد، الليلادي عيد.