The Definitive Guide to Living in the Capital , Cairo , Egypt

القاهرة فيها تماثيل مدهشة، تستحق إننا نخرج من بيتنا مخصوص علشان نزورها ونشوفها عن قرب، ومن التماثيل العظيمة في العاصمة المصرية، تمثال نهضة مصر الموجود أمام الباب الرئيسي لحديقة الحيوان بالجيزة، وهو واحد من إبداعات  المثال العظيم “محمود مختار” (١٨٩١-١٩٣٤).

وبيجسد تمثال “نهضة مصر” (١٩١٩–١٩٢٨) ست بملامح مصرية جميلة، بتقف بعظمة واعتزاز بملابس الفلاحة المصرية، وبتنظر للأمام متطلعة إلى المستقبل الجاي، وبترفع عن وجهها الحجاب بإيديها الشمال علشان تزيح الظلام وتستبدله بنور العلم والحرية والتقدم، وبتفرد إيديها اليمين بلمسة سحرية على رأس تمثال أبو الهول اللي بيفرد قائمتيه الأماميتين في تعبير عن النهوض علشان يفكرنا بالمجد القديم.

في الموضوع ده هنعرفكم على 3 معلومات مدهشة عن التمثال ده.

1 – أول عرض لنموذج مصغر من تمثال “نهضة مصر” كان في المعرض الفرنسي بباريس سنة١٩٢٠، ووقتها نال محمود مختار شهادة تقدير بسبب تميز العمل.

2 – أقيم تمثال نهضة مصر بحجمه الحالي لأول مرة في “ميدان المحطة” (رمسيس حاليًا)، وده سنة ١٩٢٨، وبعدها نُقل لميدان جامعة القاهرة سنة ١٩٥٥.

3 – اختار الفنان محمود مختار خامة الجرانيت الصلب لتنفيذ التمثال لتأكيد معنى القوة والصلابة والهيبة وهي نفسها الخامة اللي صنعت بيها أهم التماثيل المصرية القديمة.