The Definitive Guide to Living in the Capital , Cairo , Egypt

بعد التقلبات الجوية اللي عشناها على مدى اليومين اللي فاتو، وصاحبها نزول مطر بشكل كثيف على عدد كبير من مناطق القاهرة، ومحافظات تانية، وتسببت في أضرار وعطلة لكتير مننا نتيجة شوية لخبطة في الحالة المرورية في الشوارع، أصدرت الإدارة العامة للمرور نشرة فيها مجموعة إرشادات سلامة لأصحاب السيارات، خصوصًا بعد تصريح لهيئة الأرصاد الجوية، بإن الموجة هتفضل مستمرة لفترة، مع احتماليات كبيرة بسقوط الأمطار على معظم الطرق السريعة.

هنقولكم على أهم 5 نصايح جت في نشرة إدارة المرور والخاصة بإرشادات السلامة:

1- لو مضطرين تسوقوا أثناء المطر، قللوا السرعة قدر الإمكان، واستخدموا إيديكم الأتنين في التحكم في عجلة القيادة (الدريكسيون) بلاش الثقة الزائدة في السواقة لأن خطأ الغير مالوش كبير.

2- بلاش الاستخدام المفاجئ للفرامل، وضاعفوا مسافة الأمان بين عربياتكم وعربيات اللي قدامكم علشان تقدروا تاخدوا وقتكم في الوقوف الآمن.

3- استخدموا الإشارات والإنتظار في حالات الوقوف المتكرر أو المشي البطئ، وبلاش الوقوف في الأماكن الممنوع فيها الانتظار علشان نحافظ على سيولة حركة المرور.

4- إحذروا من استخدام الموبايل بالذات في أوقات المطرة، لإن استخدامه أثناء القيادة بيخلينا نفقد التركيز بالإضافة لخطورة المطر.

5- حاولوا تخلوا أنوار العربية شغالة حتى بالنهار، ولو كان في شبورة أو الجو برد افتحوا زجاج العربية بدرجة تمنع تكثيف بخار الماء جوا العربية علشان تقدروا تشوفوا كويس.

في النهاية فريق “كايرو 360” بيتمنالكم السلامة دايمًا.