The Definitive Guide to Living in the Capital , Cairo , Egypt

مافيش شهر في السنة تقريبًا بياخد مساحة الاهتمام اللي بياخدها شهر أغسطس عند المصريين، وده كان واضح أوي في كلام الناس اليومين اللي فاتوا على مواقع التواصل الاجتماعي المتعددة.. بس الاهتمام اللي بنتكلم عنه ده اهتمام من نوع خاص، اهتمام من أبو تريقة و سف و ألش، اللي بيوصلوا رسالة واضحة محددة: أغسطس شهر طويل وممل ومتعب.. وللسبب ده كتير مننا بيبقى مركز أوي أنه كل الترتيبات الحلوة والسفريّات والفسح يخليها في أغسطس كمحاولة لجعل الشهر خفيف وبأقل قدر من الخساير.. ومن الواضح أن ده مش تفكير فردي، كمية الفعاليات والمهرجانات والحفلات اللي جاي لنا بيها شهر أغسطس السنة دي بتقول لنا أنه الظاهر برضه أن الجهات والمؤسسات الفنية والثقافية بتفكر بنفس طريقتنا، علشان كده هنلاقي الشهر مليان حاجات حلوة ماتتفوتش في كل يوم من أيامه تقريبًا.. واحنا برضه ناويين نكون جزء من فريق عمل تخفيف حر أغسطس عليكم، فهنجمع لكم أهم الفعاليات دي، علشان تبقى زي الكتالوج بالنسبالكم وقت ما تحبوا تقضوا وقت لطيف وتحاربوا الملل والتعب.

واضح أن أغسطس يستحق سمعته فعلًا، دخلة الشهر حامية زيادة عن اللزوم.. في أول أسبوع منه هنلاقي نفسنا قدام حفلتين للفنانة السورية الشابة "فايا يونان" اللي بتواجه الجمهور المصري في زيارتها الأولى لمصر، الحفلة الأولى هتكون في القاهرة على المسرح المكشوف بدار الأوبرا يوم الثلاثاء 2 أغسطس، والحفلة الثانية هتكون يوم 4 أغسطس في مكتبة الإسكندرية.

وفي نفس الأسبوع هتستمر فعاليات المهرجان القومي للمسرح في دورته التاسعة لحد يوم 8 أغسطس تحديدًا.. المهرجان اللي طلته علينا السنة دي طلة مميزة جدًا جدًا بشهادة الجمهور والمشاركين، مش بس علشان قدر يقدم لنا تنوع فني عظيم من خلال العروض المختلفة، لأ كمان علشان السنة دي كتير من العروض قدمت وجوه شابة كتيرة ظهرت بأداء مميز جدًا وواعد بمستقبل عظيم لهم و لفن المسرح المصري لو كملوا في السكة بنفس الدرجة من الإتقان والتركيز.. تقدروا تعرفوا عن فعاليات المهرجان بشكل أفضل من خلال متابعة صفحة الفيسبوك الخاصة بيها.

أما في ثاني أسابيع الشهر فطبيعة الفعاليات هتتجه ناحية الثقافة شوية، بدايةً من معرض كتاب الساقية اللي هيبدأ يوم 8 وهيستمر لحد يوم 13 وهيبقى متضمن لمجموعة فعاليات فنية وثقافية تانية زي حفلات توقيع لكتاب مشاهير وندوات ثقافية وجلسات نقاشية وأحيانًا كمان حفلات وعروض فنية.. وكمان هنلاقي عندنا يوم 11 حفل توقيع رواية واحد من أفضل الكتاب المعاصرين وهو الدكتور أحمد خالد توفيق، الحفل هيكون في مكتبة ديوان فرع الزمالك لروايته الأخيرة "ممر الفئران" اللي حققت نسب مبيعات جيدة جدًا ونالت اهتمام نقدي كبير بيمثل لنا مؤشر إيجابي عن مدى تأثيرها.

وفي النصف الثاني من الشهر فهترجع تاني الفعاليات الفنية تاخد وضعها وهنعيش أحلى فترة مع مهرجان القلعة للموسيقى والغناء اللي هيبتدي يوم 17 وهيستمر لحد 2 سبتمبر، وهيتضمن مجموعة حفلات وليالي ماينفعش تفوتنا الحقيقة.. غير أنه هيبقى مجمع كوكبة كمان من الأسماء الكبيرة اللي كلنا نحب نتفرج على عروضها مباشرةً وبعيدًا عن حواجز الشاشات، زي غالية بن علي ونسمة محجوب و مدحت صالح و محمد الحلو و علي الحجار و إيمان البحر درويش، ومن الفرق: عمدان النور و المولوية المصرية و أيامنا الحلوة و غيرهم كتير.
 

وهنختتم أيام الشهر مع فعاليات لفرق صعدت على الساحة الفنية من فترات قريبة نسبيًا وحققت انتشار وقبول كبير بين الجمهور والمتابعين.. زي حفل فرقة الحضرة للإنشاد الصوفي من التراث المصري اللي هتكون يوم 19 في مركز الربع الثقافي، وحفل فرقة "إسكندريللا" اللي هيكون يوم 26 في ساقية الصاوي، وغيرهم.. وربنا يجعل أغسطس شهر سعيد وخفيف علينا وعليكم جميعًا.