The Definitive Guide to Living in the Capital , Cairo , Egypt

الحياة في كايرو

أهم تطبيقات الهواتف الذكية لحياة أسهل داخل القاهرة

أهم تطبيقات الهواتف الذكية لحياة أسهل داخل القاهرة
بواسطة
Omar Mossad

الحياة في القاهرة بتتطلب قدر كبير جدًا من الصبر، وقدر أكبر شويتين من المعرفة، لو الحاجتين دول موجودين ده هيسهل عليك كتير جدًا حياتك هنا، والمعرفة هنا المقصود بها المعرفة الخاصة بأهدافك جوه العاصمة وإزاي توصل لها بأسهل وأسرع طريق.. ولأن مش كلنا اجتماعيين بنفس الدرجة ومش بنمتلك شبكة علاقات بنفس الاتساع، فمش دايمًا هيبقى متاح لينا أننا نسأل صديق، وهنحتاج وقتها لحاجة تانية نقدر نعتمد عليها، وأحد البدائل المتاحة للاعتماد عليها بقوة هي تطبيقات الهواتف الذكية، وإحنا هنا جمعنا لك مجموعة تطبيقات ممكن تسهل عليك شوية حياتك اليومية في القاهرة.

 

"بيقولك-Bey2ollak"
القاهرة بقت مرتبطة في أذهان الجميع بالزحمة، يعني أول ما تسمع كلمة القاهرة ييجي في بالنا طريق متعطل ولا كوبري واقف! تطبيق "بيقولك" من التطبيقات اللي وجودها أصبح ضروري جدًا، ونقدر نعتبره سلاح مثالي لمحاربة زحام العاصمة.. الأبلكيشن معتمد على بلاغات المستخدمين عن الطرق اللي بيمشوا فيها في وقتها.. وبناءً على مجموع البلاغات دي بتتحدد حالة الطريق إذا كان ماشي وللا نص نص وللا واقف خالص.. وده هيفيدك في أنك تتفادى مشكلة الزحام قدر الإمكان.

 

"أوبر-Uber"
التطبيق الأشهر حاليًا في القاهرة هو وابن عمه "Careem".. ودي تطبيقات بتحاول أنها توفرلك بديل جيد وموفر وآمن ومريح عن المواصلات العامة أو حتى التاكسي، الميزة دايمًا بتكون في كذا حاجة: التكلفة بتكون أقل نسبيًا من التاكسي العادي، والطلب بيجيلك في المكان اللي أنت عايزه يعني أنت مش مضطر تطلع في حتة معينة علشان توصل لمكان ملائم تركب منه، والميزة المهمة أنه بيوصل لأماكن غالبًا مش هتلاقي حد يحب يروحها ولا يوصل لها إما لأنها بعيدة أو لأنها نائية أو لأنها زحمة.

 

"يالهوي-Yalahwy!"

القاهرة مش دايمًا آمنة، أو مش كلها يعني.. في أماكن مقلقة، وبنحتاج نبقى حريصين جدًا وإحنا موجودين فيها.. التطبيق ده غريب شوية لكنه ممكن يكون مناسب جدًا لأغلب البنات وأحيانًا للشباب اللي بيضطروا يمشوا من أماكن مقلقة أو طرق هادئة، فكرته ببساطة أنك لما تتعرض لخطر مش هيكون عندك الوقت أنك تطلع موبايلك تكلم حد، ولا أنك تستخدم السوشيال ميديا مثلًا في أنك تبلغ أصحابك أنك في خطر.. فالتطبيق هيوفر لك عامل الوقت اللي بيبقى حاسم ساعتها، وده بأنه بيكون مرتبط بحساب فيسبوك بتاعك.. بلمسة واحدة على شاشة التطبيق وقت الخطر بيقوم منزل عندك على فيسبوك كلمة "يالهوي" والمكان اللي أنت متواجد فيه علشان أصدقائك القريبين منك يحاولوا يساعدوك سريعًا.

 

"Yellow Pages Egypt"

النسخة المصرية من دليل الـ Yellow pages اللي هتديك فرصة لمعرفة كل التفاصيل عن كل جهات الخدمات الخاصة والعامة وأماكن تواجدها.

 

حاجة كمان نقولها كده على جنب.. في خدمات كتير جدًا موجودة على التطبيقات المشهورة اللي موجودة عندنا كلنا وبنستخدمها من غير ما نعرف أي حاجة عن الخدمات دي وممكن نكون محتاجينها فعلًا!
يعني مثلًا.. تطبيق فيسبوك "Facebook" مؤخرًا بقى يلقط الـ Location بتاعك ويقولك في بداية الـ News feed اسم أحد الأماكن المشهورة اللي أنت جنبها ويقول لك كمان شوف كلام الناس عنه في الـ reviews اللي على صفحته على فيسبوك.
وهكذا بقى.. ميزات وخدمات كتير هتلاقيها بتنضاف مع الوقت وإحنا مابنبقاش مركزين معاها وممكن تبقى مفيدة جدًا في كثير من الأحيان، وكذلك تطبيق "Maps" لو تابعت الميزات اللي بتضاف ليه مع كل تحديث هتلاقي تسهيلات كتير هتفيد أكتر في معرفة الأماكن حواليك.

وبس ياسيدي..
يدوم تعاملك أذكي، وتدوم حياتك أسهل.

مقترح