The Definitive Guide to Living in the Capital , Cairo , Egypt

بما أن الإجازة بدأت لكتير من الطلبة بمختلف المراحل العمرية وطبعًا ده وقت الراحة خلال 15 يوم بنرتاح أيام قليلة عن المدرسة والمذاكرة والدروس والكل سواء آباء وأمهات أو طلبة محتاجين يفصلوا شوية علشان يرجعوا فريش ومودهم حلو ومنفتحين على عودة متميزة في الدراسة، النهاردة هنقولكم على 5 خروجات تنبسطوا فيها وتغيروا المود وتفصلوا عن جو المذاكرة، واحنا راعينا التنوع الجغرافي في المقال ده علشان تشوفوا القريب منكم وتزوروه.

ماجيك بلانيت

لهم فروع كتير “المعادي – ألماظة – مول مصر” لكن النهاردة هنتكلم عن فرع كايروفيستيفال القاهرة الجديدة، وعندهم ألعاب كتير متميزة زي ألعاب الفيديو، وألعاب المهارة، وألعاب الجوائز، وألعاب الركوب”، وكل فئة فيها ألعاب كتير مختلفة تناسب الكبار والأطفال، واللعب هناك بيكون بنظام البطاقات المشحونة، وعلى حسب شحنكم من خدمة العملاء سواء في المكان أو أونلاين تقدروا تلعبوا كل الألعاب المتاحة لحد ما تخلص فلوس الكارت وعندهم باقات تبدأ من 550 جنيه.

مواعيد العمل في فرع القاهرة الجديدة من 10 صباحًا حتى 12 مساءً.

العنوان: مول كايرو فيستيفال سيتي – القاهرة الجديدة.

تقدروا تعرفوا أكتر عنهم من هنا.

دريم بارك

المكان ده نقدر نقول عليه “روائح الزمن الجميل” اللي اتربينا عليه وكل الآباء كانوا بييجوا من محافظات مصر علشان اولادهم يلعبوا فيه والأولاد بقوا دلوقتي هما الآباء والأمهات وأكيد هينبسطوا أكتر لما ياخدوا أولادهم لمكان طفولتهم، وعلشان كده بنشجعكم تزوروا دريم بارك وكمان تستمتعوا بالألعاب المتميزة والتجديد واللي آخر حاجة فيه كانت “حديقة حيوان” مصغرة لوقت أكثر متعة، وأسعار تذاكر دريم بارك تبدأ من 300 جنيه للفرد و1100 جنيه لأسرة كاملة مكونة من أبوين وطفلين.

مواعيد العمل في دريم بارك من 10 صباحًا حتى 7 مساءً.

العنوان: طريق الواحات – كومباوند دريم بارك.

تقدروا تعرفوا أكتر عنهم من هنا.

متحف الطفل

دي خروجة على الرايق، علمية تعليمية مخصصة للأطفال وأكيد هيستفيد منها كمان الكبار لأنه مش مجرد متحف للفرجة ولكن فيه ورش تعليمية وعروض تفاعلية واستكشاف بطرق ملهمة وتركيزهم دايمًا على تنمية قدرات الأطفال وإثراء ثقافتهم، وأسعار التذاكر تبدأ من 40 جنيه للفرد وبتشمل دخول الحديقة ومنطقة الألعاب، أو ممارسة نشاط واحد، وعندهم تذكرة بسعر 75 جنيه لو حابين تحضروا عرض القبة السماوية المتنقلة، وبتوصل أسعار التذاكر لـ90 جنيه لما تدخلوا دور واحد في المتحف والحديقة ومنطقة الألعاب، أو تزوروا مركز العلوم والحديقة ومنطقة الألعاب.

مواعيد العمل: يوميًا من الساعة 9 صباحاً إلى الساعة 2 مساءً.

العنوان: 34 شارع أبو بكر الصديق – النزهة – مصر الجديدة

تقدروا تعرفوا أكتر عنهم من هنا.

فاميلي لاند

دي مش مجرد منطقة ألعاب أطفال وبس ولكن فيها سينما ومطاعم وكافيهات هتناسب كل الأذواق وعلى الرغم أن منطقة ألعاب الأطفال متوسطة إلا أنكم هتزهقوا من كتر اللعب وبالمناسبة إحنا ككبار بنروح نلعب هناك شوية ألعاب على ذوقنا حتى لو مش معانا أولادنا،  وكمان هتلاقوا عندهم لعبة البولينج بسعر 100 جنيه للفرد والتزلج على الجليد بـ120 جنيه للنصف ساعة للفرد، و البلياردو بـ90 جنيه للنصف ساعة، وتنس الطاولة الساعة بـ70جنيه، وألعاب الأطفال بتختلف حسب الألعاب ولكن تبدأ من 20 جنيه.

مواعيد العمل في فاميلي لاند من الساعة 12 ظهرًا حتى الساعة 12 مساءً.

العنوان: أبراج عثمان – كورنيش المعادي.

تقدروا تعرفوا أكتر عنهم من هنا.

Play Time

لهم فروع مختلفة في “مصر الجديدة – أكتوبر – شبرا الخيمة” واحنا النهاردة هنتكلم عن فرع وسط البلد اللي هتلاقوا فيه ألعاب “قوة – أدرينالين – ضحك – فيديو – تحدي” وغيرها من الألعاب المميزة اللي سعرها بيبدأ من 25 جنيه وحتى 100 جنيه، واللعب هناك بنظام الكارت وسعر الكارت لوحده 30 جنيه وسعر دخول الفرد للملاهي 5 جنيه.

مواعيد العمل في Play Time من الساعة 1 ظهرًا حتى 11 مساءً.

العنوان: أركاديا مول – كورنيش ماسبيرو – بجوار فندق فورمنت.

تقدروا تعرفوا أكتر عنهم من خلال صفحة الفيسبوك من هنا.

أخيرًا حابين نوضح أن الأسعار دي استرشادية بناءً على البحث الخاص بينا وقت كتابة المقال، وممكن تتغير في أي وقت من قبل إدارة المكان فلازم تتأكدوا من كل الأسعار.