The Definitive Guide to Living in the Capital , Cairo , Egypt

يمكن لو قولنا لكم إن فيه مهرجان موجود عندنا هنا في مصر، وتحديدًا في قلب القاهرة بيستضيف ألعاب الفيديو “video games” وعشاق الأنيميشن “Animation” ورسوم الكارتون ممكن تستغربوا، وأكيد لو قولنالكم إن في المهرجان ده ممكن تشوفوا شخصيات الكرتون اللي بتحبوها وعيشتوا طفولتكم معاها بشحمها ولحمها هتنبسطوا جدًا!

في السطور الجاية هنقولكم على 5 معلومات مهمة ولازم تعرفوها عن مهرجان “إيجيكون”.. أول وأهم مهرجان سنوي في مصر وشمال أفريقيا لعشاق الإنيمي والكرتون.. تعالوا نعرفهم مع بعض:

1- مهرجان “إيجيكون” مهرجان سنوي، والسنة دي 2020 هتبقى السنة السابعة ليه، وبيحضره كل المهتمين بالثقافة اليابانية، والقصص المصورة “الكوميكس” وفن الرسم الياباني المعروف بـ “المانجا”، والرسم والتصوير، والمسلسلات والأفلام الأجنبية، والجيمز.

2- فعاليات المهرجان بتكون لمدة يوم واحد في السنة، وهو يوم 31 يناير، وهيكون في الـ”جريك كامبس” الساعة 2 الظهر، في الجامعة الأمريكية في التحرير، وأسعار التذاكر هتكون 180 جنيه للفرد الواحد أو تذكرة جماعية بـ 800 جنيه لـ5 أفراد، وبيتقدم فيه أكلات يابانية وبيتباع فيه منتجات يدوية.

3- برنامج المهرجان منقسم لجزئين الأول هو برنامج “القاعة” وهيتقدم فيه مسابقات وبطولات ألعاب الفيديو، وهيشترك فيها أشهر اللاعبين “الجيمرز” المحترفين والهواة، وهتكون في “جيمرز لاونج أرينا” وهي مساحة مخصصة للجيمرز، والمنافسات هتكون في ألعاب مختلفة زي (Medal Of Honor) و(League of legends) و(Tekken 7) و(Mortal Kombat X) ده غير لعبة ((Counter Strike (CS:GO) واللي تعتبر واحدة من أقوى الألعاب التنافسية فى العالم، أما عشاق كرة القدم فهيكون قدامهم منافسة شرسة مع أصدقائهم في (FIFA 2020).

4- البرنامج الثاني هو برنامج “المسرح” وهيكون فيه مسابقات أسئلة عن الإنيمي، وكاريوكي وعروض للموهوبين، وكل ده هيكون في حفلة غنائية لـ “سبيستون” وأغاني الإنيمي.

5- المهرجان هو المكان الوحيد اللي بيستضيف عروض “الكوسبلاي – Cosplay” وهي عروض بيلبس فيها كل واحد زي تنكري للشخصية الخيالية من الإنيمي أو اللعبة أو الكوميكس أو المسلسل الكرتوني اللي بيحبها.

ممكن تعرفوا أكتر عن المهرجان وفعالياته من خلال صفحتهم الرسمية على الفيسبوك من هنا.

أو تحجزوا التذاكر وتعرفوا البرنامج من هنا.