The Definitive Guide to Living in the Capital , Cairo , Egypt

يمنى أحمد

جربت تدخل مكان تلاقي فيه رائحة الليمون فواحة وروائح البرتقال وكل الروائح الحلوة اللي ممكن تتخيلها؟! وزارة الزراعة عملت حاجة حلوة أوي في الدقي جمعت فيها بين الجمال الشكلي وبين المنفعة وادتنا روح جديدة خضراء اسمها “الواحة الخضراء”، يلا بينا نشوف تفاصيل الواحة دي.

كايرو 360 قررت تدور على مكان جديد في القاهرة، يكون استثنائي، وكان الحظ في الواحة الخضراء بالدقي، ودي واحة عملتها وزارة الزراعة المصرية بتضم معرض دائم للزهور ونباتات الزينة، ومكانها خلف سور نادي الصيد بمقر الدقي للزراعات المحمية التابع لمركز البحوث الزراعية.

لما تدخل المكان هتقابلك نباتات الزينة والمختلطة بروائح كتيرة حلوة تقدر تستمتع بكل ده لما تمر بين 62 ممر ورواق بيجمعو بين شتلات الفاكهة وبين النبات الطبيعي المزين بفروع من الزهور الصناعية، طبعًا ده غير الشلالات والمياه والمكان المناسب جدًا للتصوير، سواء كنت من عشاق التصوير أو لا بس فعلا المكان مش هتقدر تخرج منه غير وانت واخد لك كام صورة تذكارية توثق بيهم اليوم الحلو ده.

طبعًا المكان متوفر فيه حاجات تانية خاصة بالزراعة زي البذور المختلفة للزهور، وأصص الزرع اللي موجودة بأحجام وأشكال مختلفة، واللي مناسبة إنك تزرع فيها في أي مكان سواء في البلكونات بتاع بيتك أو فوق السطوح، ده بجانب إن المنتجات اللي بتقدمها الواحة جاية من محافظات كتير زي سيناء ومطروح وسيوة.

المعرض بيفتح كل يوم من الساعة 10 صباحًا وحتى 9 مساءً، ومش بس بيميزه إنه فاتح طوال أيام الأسبوع، لكنه خلق كمان فرصة للطلبة من الكليات المختلفة إنهم يشاركوا فيه ويعرضوا، كمان أتاح فرصة للتدريب والممارسة بين المنتجين في مصر وبين الزائرين من الخارج علشان يكون فيه إنشاء لمشروعات التشجير ودي الفكرة اللي قامت عليها الواحة من الأول أصلًا.

الواحة مش بس بتضم زهور وأشجار ونباتات زينة، هي كمان بتضم عروض لأعمال يدوية بسيطة تقدر تشتري منها، وأشغال منزلية سهلة الصنع، ده غير استنبات الشعير اللي بيتم عن طريق تكنولوجيا الزراعة المائية.

كل ده وأكتر بتعمله وزارة الزراعة علشان توصلك فكرة إن النبات مهم، وإن الجمهورية الجديدة مؤمنة بالحفاظ على البيئة وإن المستقبل هيكون أخضر وواعي. الدقي مش بعيدة.. جرب تاخد أسرتك وتروحوا تستمتعوا بجو مختلف، نفسيتكم هتتحسن بالزرع وهتشوفوا حاجة تانية بدل زحمة القاهرة الدائمة!