The Definitive Guide to Living in the Capital , Cairo , Egypt

الفترة دي الأسعار بقت عالية شوية، وكتير مبقاش يخرج زي الأول، ولكن الروح والنفسية أكيد بتكون محتاجة خروجة نرفه فيها عن نفسنا ونخرج من ضغوط الحياة، ومفيش أحلى من خروجة في الطبيعة الخلابة مع مصاريف قليلة تخلينا نعمل ريستارت لحياتنا علشان بكرة نكمل، وعلشان كده هنعرفكم بـ3 حدائق في القاهرة تقدروا من خلالها تستمتعوا بجو رومانسي مع حبايبكم وبدون تكلفة عالية.

حديقة الأسماك

معروفة من زمان أنها ملتقى العشاق، وحتى الأفلام الرومانسية كانت بتتصور فيها، لأن ديكوراتها وطبيعتها هتخلي أي تصوير مختلف ومميز، وهي من أقدم الحدائق المصرية واتبنت سنة 1867، وسعر التذكرة بتاعتها لسه 5 جنيه، ومواعيدهم من 9 صباحًا حتى 5 مساءً.

العنوان: شارع الجبلاية – بجوار السفارة الألمانية – الزمالك.

حديقة الحرية

من المتنزهات اللي ليها تاريخ عريق وهي اتبنت سنة 1876، وكانت الحديقة من ضمن خطة الخديوي إسماعيل لتحويل القاهرة قطعة من أوروبا، وفيها أشجار نادرة ومعمرة ومتميزة هتخلي القعدة فيها رومانسية وجميلة، ومسموح فيها بدخول الأكل كمان، وسعر التذكرة 10 جنيه، وبيشتغلوا يوميًا من 10 صباحًا حتى 11 مساءً.

العنوان: بجوار شارع مجلس قيادة الثورة – كوبري قصر النيل – أمام دار الأوبرا المصرية.

حديقة الأزهر

مش مجرد حديقة رومانسية هتنبسطوا فيها، ولكن احنا بنعتبرها كيان علاجي نفسي علشان هي موجودة في موقع يخليك تشوف الآثار الإسلامية بشكل مميز، وكمان فيها أشجار ونباتات ترد الروح وتجدد المشاعر بين الأحباب، وهي من الحدائق اللي تقدروا تقضوا يوم كامل فيها ومتزهقوش، وسعر التذكرة 25 جنيه، ولكن في الويك إند بـ30 جنيه، وهما بيتشتغلوا كل يوم من 9 صباحًا حتى 10 مساءً.