The Definitive Guide to Living in the Capital , Cairo , Egypt

إجازة عيد العمال والويك إند كمان جاي وراها! يعني أكيد كلنا بندوّر على خروجة لطيفة تنفع لكل أفراد الأسرة، ومن غير ما الميزانية تتأثر.. خصوصًا إننا في موسم امتحانات والدروس الخصوصية شغّالة على ودنه!

علشان كده جمعنالكم 5 حدائق جميلة وأسعارها في المتناول، تقدر تفسّح فيها العيلة وتغيّروا جو من غير ما تدفعوا كتير.

حديقة الأسماك – الزمالك

بتذكرة بـ5 جنيه بس، هتدخل عالم ساحر وسط الخضرة وتصميمات فريدة من عصر الخديوي إسماعيل.

أقرب محطة مترو: صفاء حجازي – الخط الثالث.

منتزه الطاهرة – سراي القبة

قريب من قصر الطاهرة الجمهوري، وفيه عروض فنية للأطفال، ومناطق ألعاب وتصوير.

أقرب محطة مترو: سراي القبة – الخط الأول. وسعر التذكرة 5 جنيه.

حديقة عابدين – وسط البلد

جنب قصر عابدين الجمهوري، وفيها كيدز إيريا، مطاعم وكافيهات.

أقرب محطة مترو: محمد نجيب – الخط الثاني، والتذكرة بـ5 جنيه.

الحديقة اليابانية – حلوان

تجربة مختلفة وسط 44 تمثال ياباني، فوانيس وردي، مراكب مائية، وأشجار ضخمة.

أقرب محطة مترو: حلوان – الخط الأول، وتذكرتها بـ10 جنيه.

حديقة نيل المعادي – طرة

على ضفاف النيل، مثالية للتصوير وقت الغروب، وفيها ألعاب ومطاعم.

أقرب محطة مترو: كوتسيكا – والتذكرة بـ10 جنيه.

وأخيرًا..

في النهاية، الخروجة الحلوة مش دايمًا لازم تكون في مكان غالي أو بعيد.. ساعات فسحة بسيطة في حديقة خضرا وسط العيلة بتسيب ذكريات أحلى بكتير من أي حاجة تانية. استمتعوا بإجازة عيد العمال، وخلّوا الويك إند فرصة حقيقية للراحة ولمّة الحبايب.