The Definitive Guide to Living in the Capital , Cairo , Egypt

الصورة: Sofia Lasheva

بعد موافقة الرئيس عبد الفتاح السيسي على تعديلات قانون الإيجارات القديمة، واللي أقرها مجلس النواب بشكل نهائي، ناس كتير بدأت تسأل: “يا ترى الشقة اللي ساكن فيها هتدخل ضمن القانون الجديد؟ وهندفع كام إيجار؟”. في المقال ده هنشرحلك ببساطة إزاي تحسب الإيجار الجديد، وإيه تصنيف منطقتك، وكمان هتدفع كام شهريًا بعد سريان القانون.

ندخل في الموضوع! بعد سنين من الجدل حوالين قانون الإيجارات القديمة، الرئيس عبد الفتاح السيسي وافق رسميًا يوم الاثنين 4 أغسطس على التعديلات الجديدة اللي أقرها مجلس النواب، واللي بتدخل العلاقة بين المالك والمستأجر في مرحلة جديدة خالص.

القانون الجديد بيقول إن كل محافظة هتشكل لجنة متخصصة هتحصر وتقيم المناطق السكنية، وهيتم تصنيفها لـ3 أنواع:

مناطق متميزة.

مناطق متوسطة.

مناطق اقتصادية.

وده هيتم في مدة أقصاها 3 شهور من وقت سريان القانون، والمحافظ هو اللي هيصدر القرار النهائي، وهيتم نشره رسميًا وتعليقه في مقار الإدارات المحلية علشان الكل يعرف.

مايفوتكش كمان: كراسة شروط “سكن لكل المصريين 7” متاحة الآن: اعرف خطوات التقديم ورابط التحميل

طيب الإيجار هيزيد بنسبة كام؟

القانون حدد القيمة الإيجارية الجديدة على حسب تصنيف المنطقة:

لو منطقتك متميزة: الإيجار هيبقى 20 ضعف الإيجار اللي كنت بتدفعه، بس بشرط يكون الحد الأدنى 1000 جنيه في الشهر.

لو منطقتك متوسطة: هيكون 10 أضعاف، بحد أدنى 400 جنيه.

ولو منطقتك اقتصادية: برضه 10 أضعاف، بس بحد أدنى 250 جنيه.

يعني هتدفع كام؟

مثلًا، لو ساكن في شقة إيجارها القديم 15 جنيه في مصر الجديدة، والمنطقة اتصنفت كمتميزة، فالمفروض الإيجار الجديد يبقى:

15 جنيه × 20 = 300 جنيه

بس لأن الحد الأدنى هو 1000 جنيه، فده اللي هتدفعه شهريًا.

والمحال والعيادات؟

لو المكان مؤجر لغرض غير السكن (زي العيادات أو المحلات أو المكاتب)، فالإيجار هيبقى 5 أضعاف القيمة اللي بتدفعها دلوقتي، وهيزيد كل سنة بنسبة 15%.