استمارة الاشتراك بقت أونلاين.. تفاصيل أحدث خدمة رقمية للخط الثالث لمترو الأنفاق
استمارة الاشتراك في الخط الثالث اشتراكات المترو الإشتراك أونلاين في المترو الخط الثالث للمترو الخط الثالث لمترو الأنفاق تفاصيل الاشتراك في المترو مترو الأنفاق مواصلات القاهرة
Mohamed Talaat
لو كنت بتستخدم الخط الثالث لمترو أنفاق القاهرة، فعندنا خبر حلو علشانك.. شركة “اّر.إيه.تي.بي” الفرنسية، المسؤولة عن تشغيل الخط الثالث للمترو، أطلقت خدمة رقمية جديدة للجمهور، وهي ملء استمارة الاشتراكات بطريقة إلكترونية للطلبة والركاب اللي بيستخدموا المترو بشكل مُنتظم، بهدف توفير تجربة نقل سهلة للركاب وفي نفس الوقت الاستفادة من اتجاه الدولة لدعم التحول الرقمي.
وهتساهم الخدمة دي، بحسب بيان للشركة، في توفير الوقت والجهد بالنسبة للمُستخدمين اللي هيقدروا يشتركوا من خلال ملء نموذج الاشتراك المتاح عبر الإنترنت عن طريق موقع الشركة (الرابط هنا) واستلام الاستمارة عبر خدمة الواتس آب أو البريد الإلكتروني.
وهيتم احتساب التكلفة بناءً على عدد الرحلات ومدتها مع وجود أسعار خاصة للطلاب وكبار السن.
بعد ما هتوصلك الاستمارة، ومن خلال زيارة واحدة فقط، هتقدر تقدمها لواحدة من النوافذ المُخصصة للاشتراكات في محطات مترو العتبة، والعباسية، وهليوبوليس، ومحطة عدلي منصور، وبعدها هتقوم بدفع الرسوم المُقررة والحصول على كارنيه الاشتراك فورًا.
والخط الثالث لـ مترو الأنفاق بيحتوي على 19 محطة بطول 23 كم لربط منطقة وسط البلد بالمحطة المركزية التبادلية بعدلي منصور من خلال محطات في كافة المناطق الحيوية بالإضافة إلى 15 محطة جديدة تحت الإنشاء، وبتبدأ ساعات العمل اليومية من الساعة 5 صباحًا حتى الساعة 12 صباحًا، من خلال أسطول عدده 15 قطار بيشتغلوا على مدار الساعة لاستيعاب عدد الركاب.
وبتستغرق الرحلة من محطة عدلي منصور لحد العتبة حوالي 37 دقيقة، وده بيخلي الخط الثالث للمترو واحد من أفضل خيارات التنقل في القاهرة.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
