The Definitive Guide to Living in the Capital , Cairo , Egypt

الإجازة الصيفية لسة مكملة! وده الوقت اللي أطفالنا بيحتاجوا فيه تغيير جو علشان يقدروا يرجعوا بنشاط من تاني للدراسة والمذاكرة. للأسف الظروف الاقتصادية الراهنة خلت الحروجات مش من أولوية عند عائلات كتير، علشان كدة هنقول لكم على مجموعة من الأماكن اللي ممكن تخرجوا فيها مع أطفالكم بمبالغ بسيطة.

 

مسرح العرائس

بيقدموا عروض مختلفة تناسب كل الأعمار وبيعتمدوا على فنون الظل وتحريك العرائس بقصص وروايات مهمة لكل الأطفال علشان يتعلموا حكم من خلال الحكي، والتذاكر هناك بتبدأ من 32 جنيه، ومناسب للأطفال من سن 3 سنوات، وموجود في ميدان العتبة.

 

فاميلي بارك

فاميلي بارك فيها حديقة حيوان، سفاري، نهر سحري، قرية ترفيهية، ملاعب مفتوحة، قطار، فنار، قصر الاستكشافات، أنشطة فنية وثقافية، متحف تاريخي، مسرح مركز ورش للفنون والتكنولوجيا، سينما ثلاثية الأبعاد، مبنى الحواس الخمس، وكمان مطاعم مختلفة أشهرهم مطعم الغابة اللي هتنبسطوا بديكوراته جدًا، وده على مساحة 70 فدان، ويبدأ سعر التذكرة للحديقة 70 جنيه، وعنوانهم: الكيلو 26 طريق السويس – مدخل 2 لمدينة الرحاب.

 

السيرك القومي

من أهم الأماكن اللي بنرشحها للخروجات الأسرية، وبيكون في السيرك القومي عروض للحيوانات المفترسة والأليفة، وكمان عروض عالمية للأكروبات، ده غير فقرتي المهرج والساحر، وأسعارهم بتبدأ من 50 جنيه، وموجودين في كورنيش العجوزة بجوار مسرح البالون.

 

الأزهر بارك

الأزهر بارك بتتميز بمساحات شاسعة من الخضرة على 72 فدان، وبتحتوي على مجموعة من الأشجار النادرة وكمان فيها مساحات للعب وعندهم أماكن تصوير حلوة ومطاعم ترضي كل الأذواق، ده غير كمان أنهم الفترة الأخيرة عملوا رحلة “الطفطف” اللي بيلف بكم في القاهرة التاريخية للتعرف على آثارها.

بيبدأ سعر التذكرة للأطفال من 25 جنيه والكبار من 35 جنيه، وهتلاقوها في طريق صلاح سالم بالقرب من مشيخة الأزهر.

حديقة الطفل

مساحة حديقة الطفل أكثر من 9 كيلو متر مربع، وفيها مسار للرياضة وسط الخضرة، وبيعملوا فقرات ترفيهية زي الساحر والأراجوز وغيرهم، وعندهم مطاعم مختلفة ومنطقة ألعاب للأطفال ومكتبة تثقيفية كبيرة، وسعر التذكرة بيبدأ من 10 جنيه، وهما موجودين في شارع السنهوري بمدينة نصر.