The Definitive Guide to Living in the Capital , Cairo , Egypt

الصورة: Omar Adel

مع بداية السنة الدراسية الجديدة، كتير من الطلبة وأولياء الأمور بيدوروا على تفاصيل اشتراك المترو اللي بيوفر تخفيض ضخم يوصل لـ90% من قيمة التذكرة. علشان كده جمعنا لكم التفاصيل علشان تعرفوا كل الخطوات والأوراق المطلوبة وأسعار الاشتراك بشكل مبسط.

إزاي تستخرج اشتراك مترو للطلبة؟

1. بتشتري استمارة اشتراك طالب من أقرب مكتب تذاكر أو اشتراكات.

2. بتملأ الاستمارة وتجهز صورتين شخصيتين 4×6 بخلفية بيضاء.

3. لازم الاستمارة تكون مختومة ومصدق عليها من جهة دراستك (الجامعة أو المدرسة + الإدارة التعليمية).

لو طالب جامعة: ختم النسر من شؤون الطلبة.

لو طالب مدرسة: 3 أختام من المدرسة + ختم من الإدارة التعليمية.

مدارس التمريض: أختام من المدرسة + وزارة الصحة.

مهم: الاستمارة ملغية لو فيها أي كشط أو تعديل أو كتابة بالأحمر.

4. بتسلم الاستمارة في مكتب الاشتراكات مع:

صورة بطاقة شخصية سارية فيها عنوان السكن، أو شهادة ميلاد + بطاقة ولي الأمر.

لو العنوان مختلف، لازم فاتورة مرافق حديثة باسم ولي الأمر (ما يعديش عليها 3 شهور).

لطلاب الجامعات: صورة إيصال القسط الدراسي أو كارنيه الجامعة للسنة الحالية.

أسعار اشتراك 3 شهور:

مرحلة: 150 جنيه.

مرحلتين: 200 جنيه.

3 مراحل: 250 جنيه.

4 مراحل أو أكتر: 300 جنيه.

يعني ببساطة، الاشتراك هو الحل الأمثل لتقليل مصاريف التنقل خلال فترة الدراسة، خصوصًا إنه بيغطي خط السير من البيت لحد مكان الدراسة مباشرة.