اشتريت موبايل جديد؟ 5 أفكار للاستفادة من موبايلك القديم
أفكار عملية تليفون ذكي تليفون قديم تليفون محمول كتب إلكترونية نصائح
Cairo 360
زهقت من تليفونك الذكي القديم وقررت تشتري تليفون محمول جديد؟ فكرت هتعمل إيه في القديم؟ هترميه أو هتركنه؟ لأ استنى.. إحنا هنقولك على 5 أفكار للاستفادة من التليفون القديم.. وده هيخليك تعيد تفكير في التخلص منه.
كاميرا للأطفال
التليفون الذكي القديم ممكن يبقى كاميرا يستخدمها الأطفال، يعني ممكن تديه لابنك أو لأخوك الصغير، وممكن تساعده في تنزيل تطبيقات لتحرير الصور، وكده الطفل هيحب التصوير، ومين عارف.. يمكن يطلع مصور محترف لما يكبر.
جهاز للألعاب الإلكترونية
فيه كتير من الألعاب الإلكترونية اللي تقدر تحملها على تليفونك الذكي القديم، وفيه ألعاب كتير منها مش محتاجة إنترنت أصلًا، يعني ممكن تلعبها أوف لاين، وكده تقدر تستخدم تليفونك القديم كجهاز مخصص للألعاب وبس، وبكده هتوفر بطارية جهازك الجديد وهتوفر مساحة كبيرة كمان.
جهاز لاتصالات الفيديو
لو كنت بتتواصل كثير مع أشخاص عن طريق تطبيقات زي “سكايب” و”فيس تايم” وباقي التطبيقات المخصصة لمحادثات الفيديو، فتقدر تستخدم تليفونك القديم للمهمة دي، وتوفر تليفونك الجديد لحاجات تانية.
منبه ومنظم للوقت
فيه أجهزة كتير متخصصة في تنظيم الوقت، وتقدر تحول تليفونك القديم لمنبه وتحمل عليه تطبيقات تساعدك على تنظيم وقتك، وبكده مش هتحتاج تشتري منبه جديد، أو جهاز لتنظيم الوقت.
قراءة الكتب
لو كنت من عشاق القراءة، فتقدر تحول تليفونك القديم لقارئ كتب إلكترونية، وده هيخليك مش محتاج تشتري قارئ كتب أو جهاز كيندل، وعلى تليفونك القديم تقدر تحمل كتب كتير جدًا وتخليه دايمًا في شنطتك.. وبكدة هتحافظ على بطارية تليفونك الجديد، وهتوفر مساحة كبيرة جدًا كمان.
مقترح
صحة ولياقة
اسكيت X.. أول أكاديمية في مصر بتعلم التزلج لأبطالنا من أصحاب الهمم!
أصحاب الهمم أكاديمية سكيت X +12
معالم وسياحة
