The Definitive Guide to Living in the Capital , Cairo , Egypt

في السنين الأخيرة بقى فيه نقص شديد لوجود سيناريو أو قصة حلوة تتحول لعمل فني راقي، ولاحظنا تحول أكتر من رواية لفيلم ونجاحهم وده دليل إن الجمهور بيقدر العمل الفني المتكامل والغني، وبهدف مساعدة كل مبدع قررت شركة كرياتيف آراب تالانت تعمل موقع “اكتبلي“.

 

والموقع ده نقدر نعتبره منصة توصل أي كاتب موهوب وعنده قصة حلوة بمنتجين محتاجين أعمال فنية، بمجرد إنه يعمل حساب على الموقع  ويعرض فكرته هيتم التواصل معاه من المنتجين المهتمين.

ودي فكرة هايلة هتساعد الكتاب الشباب والمنتجين إنهم ينفذوا أعمال فنية هادفة ومميزة، ووضح عمرو قورة مؤسس الشركة، إن الفكرة اللي هيعرضها الكاتب هي أهم حاجة المنتجين بيدوروا عليها، لأن من كتر ما الأفكار بقت مكررة، أي فكرة مميزة بقت تعتبر كنز.

الجميل إن الموقع بيفتح الباب لكل المبدعين، من كل مكان، يعني أي شخص من أي بلد يقدر يشارك بأفكاره مجرد ما يعمل حساب على الموقع.

شركة  كرياتيف آراب تالانت بتعد أول وكالة من نوعها في مصر والشرق الأوسط لرعاية وإدارة الفنانين والموهوبين في جميع المجالات الفنية. والشركة بتجمع عدد كبير من المواهب المتميزة في مجال التمثيل والإخراج والكتابة والغناء والتلحين. وده بالتعاون مع وكالة ذا آرتيست بارتنرشيب في إنجلترا ولوس أنجلوس واللي بدورها هتوفر فرص متبادلة لترشيح فنانين أجانب للعمل في السوق العربي وإتاحة الفرص للفنانين المصريين والعرب للمشاركة للعمل في السوق الأجنبي. والوكالة اللي انطلقت في شهر مايو ٢٠١٥ متواجدة ما بين القاهرة ودبي وأبو ظبي وبيروت ولوس أنجلوس من خلال فروعها في الدول دي.

لزيارة الموقع اضغط هنا.

لزيارة صفحة الفيسبوك اضغط هنا.